Pasioni i tij për veshjet dhe detajet e bën Taulant Monçin një nga profesorët, prindërit dhe gjyshërit më të veçantë.
Ai është profesor muzike në Cërrik dhe njihet për kombinimet e tij të veshjeve me të gjitha ngjyrat e mundshme.
I ftuar në emisionin “Rudina”, profesori i muzikës zbuloi të tjera detaje rreth veshjes së tij. Monçi tha se në gardërobën e tij ka 1200 kollare, mbi 300 këmisha dhe 57 kostume, pa harruar 2 biçikletat e tij të kuqe dhe blu, të cilat i kombinon me veshjet.
“Nëna ime ka qenë rrobaqepëse dhe me copat që tepronin më qepte rroba ku kapakët e këmishave dhe jakat ishin një ngjyrë, mëngët po ashtu ishin një ngjyrë, përparësja e këmishës ishte një ngjyrë dhe kurrizi një ngjyrë tjetër. Por në ato vite unë dukesha më mirë se pedagogët. Ata që më dëgjojnë e dinë se kush jam unë. Mamaja ime kur qepte këndonte. Në ato vite për tu futur në muzikë kishte konkurs dhe jo se ishe çuni filanit.
Unë deri tani në gardërobën time kam 1200 kollare, mbi 300 këmisha dhe 57 kostume. Biçikletat i kam si fëmijë, janë kënaqësi e shpirtit tim prej 64 vitesh”, shprehet ai.
