Tenori i mirënjohur shqiptar, Saimir Pirgu është i pari artist shqiptar, që është nominuar nga Akademia e Ҫmimeve Grammy, për rolin e tij brilant në operën Król Roger (Mbreti Roger), me regjisor Kasper Holten dhe dirigjent Antonio Pappano.
“Best Opera Recording” (Regjistrimi më i mirë operistik) është kategoria ku Pirgu është nominuar bashkë me kolegë të tjerë të tij.
Pirgu e ka postuar lajmin edhe në profilin e tij zyrtar në Instagram, duke falënderuar dhe uruar të gjithë kolegët për këtë lajm fantastik.
Po kush është Saimir Pirgu?
I lindur në vitin 1981 në qytetin e Elbasanit në moshë shumë të re nis mësimet e muzikës, duke u diplomuar si violinist në qytetin e tij të lindjes kur kishte vetëm 16 vjeç. Në moshën 21-vjeçare diplomohet për kanto në konservatorin “Claudio Monteverdi” të Bolzanos, nën drejtimin e Vito Maria Brunetti-t, i cili vazhdon të jetë edhe sot mentori i tij.
Ende 22-vjeçar, ai zbulohet dhe zgjidhet nga Claudio Abbado për të interpretuar rolin e Ferrando-s në “Cosi fan tutte” në Ferrara dhe, në verën e vitit 2004, në Festivalin e Salzburgut me Philippe Jordan, duke u bërë kështu debutuesi më i ri i një roli kryesor në historinë e këtij festivali. Menjëherë pas këtyre dy evenimenteve të rëndësishme artistike nis një bashkëpunim i rëndësishëm me Operën Shtetërore të Vjenës, ku përveç të tjerash, shquhet interpretimi i tij në “Elisir d’Amore”, i cili nderohet me një nga çmimet më të lakmuara në botën e lirikës “Eberhard wAECHTER Gesang Medaille”, që u jepet të rinjve me karrierë premtuese. Më pas nis debutimi në role të rëndësishme që e çojnë artistin e ri të bashkëpunojë rregullisht me teatrot më të mëdhenj të operës në mbarë botën, nën drejtimin e dirigjentëve më të rëndësishëm të saj.
Me rastin e kthimit të Saimir Pirgut në Metropolitan Opera të Nju Jorkut me rolin e Alfredos të operës “La Traviata”, e cila u vu në skenë në përvjetorin Verdian, në mars të 2013-s, gazeta e përditshme “New York Times” i kushtoi atij një artikull të gjatë prej dy faqesh, me titullin “Tenor from the dark side of the moon” (Tenori nga ana e errët e hënës), ku përshkruhen të gjitha pikat kulmore të karrierës së tij. Albumi “Il mio Canto” është hedhur në qarkullim nga Opus arte dhe u prezantua në fund të janarit me rastin e interpretimit në operën “Traviata”, në Royal Opera të Londrës.
