Pas disa vitesh ku Greqia mbante pozicionin e parë, Italia është shpallur kuzhina më e mirë në botë për vitin 2025, duke u vlerësuar për autenticitetin, larminë dhe ndikimin ndërkombëtar.
Top 5 i TasteAtlas për kuzhinat më të mira është:
- Italia
- Greqia
- Peru
- Portugalia
- Spanja
Ndërkohë, Shqipëria ka fituar pikë të rëndësishme këtë vit, duke u afruar gjithnjë e më shumë me vendet e Mesdheut që dominojnë historikisht listën. Vlerësimet e larta për gatime tradicionale si byreku, tavë kosi, flija, peshku mesdhetar dhe ëmbëlsirat karakteristike kanë përmirësuar dukshëm pozicionin e vendit në renditjen globale.
Në kategorinë e qyteteve, Napoli ka triumfuar si destinacioni kulinar më i mirë për vitin 2025. Pas tij renditen qytete të tjera italiane si Milano, Bolonja dhe Firence, duke e bërë Italinë vendin me përfaqësimin më të fortë në krye të listës. Dhjetëshja vijon me Mumbai dhe Xhenova, duke reflektuar një ndërthurje të traditave mesdhetare dhe aziatike në gastronominë botërore.
Edhe për fqinjët tanë, ky vit ka qenë i suksesshëm: Hania në Kretë renditet në vendin e 64-t, ndërsa Heraklioni në vendin e 91-të.
Edhe pse nuk është ende në top 50-she, Shqipëria ka shënuar rritje të dukshme, duke u vlerësuar sidomos për kuzhinën tradicionale që po fiton gjithnjë e më shumë adhurues nga vizitorët e huaj. Gatimet shqiptare janë përmendur shpesh në publikimet e TasteAtlas për shijet autentike dhe produktet natyrale, duke i dhënë vendit një imazh të fortë gastronomik në rritje.
Arritja e Napolit konsiderohet e merituar. Qyteti i njohur si vendlindja e picës vazhdon të ruajë statusin e tij historik me receta si: pica napolitane, pica fritta, ëmbëlsira ikonike si sfogliatella.
Pjatat tradicionale, si spageti alla puttanesca dhe spageti alla vongole, mbeten pjesë e identitetit kulinar të qytetit, i cili vazhdon të jetë një magnet për vizitorë nga e gjithë bota.
