Teksa mbetet të vendoset nga Ministria e Arsimit në lidhje me mënyrën sesi do të zhvillohet mësimi vitin e ri akademik në mes të një pandemie, deri më tani një gjë është e sigurt: nxënësit dhe studentët nuk do të kthen 100% në bankat e shkollave.
Deri më tani është propozuar një alternim midis paraqitjes së nxënësve në shkolla dhe mësimit online. Por nëse nxënësit në shkollat private apo studentët e IAL-ve publike ose jo publike e zhvillojnë mësimin online, atëherë përse duhet të paguajnë të njëjtën tarifë që paguanin kur shkonin në shkollë?
Kjo çështje e ngritur me mjaft shqetësim nga “iconstyle.al” u mbështet nga shumë studentë që iu përgjigjën sondazhit të zhvilluar dy ditë më parë me temë: A duhet të ulet tarifa nëse mësimi do të jetë online vitin e ri shkollor?
Dhe sipas rezultateve, 98 % e pjesmarrësve mendonin se tarifa duhet të ulet nëse mësimi do të zhvillohet online këtë vit të ri akademik dhe vetëm 2% mendonin se nuk duhet të ulet. Kjo shifër tregon rëndësinë e madhe të kësaj çështjeje që i shqetëson familjet shqiptare, edhe pse si për çdo problematikë tjetër, sërish ekziston ai skepticizmi i tipit “kush na pyet ne”!
Arsyet që numëronin për uljen e tarifave ishin nga më të ndryshmet (lexo këtu), por më kryesor ishte fakti që njohuritë e marra në shkollë/universitet nuk janë të njëjta me ato marra para një kompjuteri. Shumë shpreheshin se kishin vështirësi financiare në këtë periudhë pandemie, që i ka gjetur prindërit e tyre pa punë.
Një arsye jo pak e rëndësishme ishte fakti që duke qenë se nxënësit mësojnë nga shtëpia, atëherë nuk kanë përse të paguajnë për transportin, ushqimin në shkolla, dritat, internetin apo shpenzime të tjera të shkollave private, në një kohë që qëndrojnë në shtëpi.
Nga ana tjetër, 85% e pjesëmarrësve në studim shpreheshin se kishin pakënaqësi me mësimin online dhe vetëm 15% pranonin se studionin si të ishin në bankat e shkollës.
Universitetet dhe kolegjet në SHBA po ulin ose po ngrijnë pagesat!
Mësimi online është një fenomen mbarëbotëror në këtë periudhë pandemie, dhe ka mjaft universitete apo kolegje në SHBA (Massachusetts Board of Trustees, Bergen Community College etj) që e kanë marrë në konsideratë uljen e tarifave ose ngrirjen e pagesave të shkollës në prag afati.
Në vend të kërkimit të një pagese të plotë, bordet ekzekutive të shkollave po mendojnë sesi ta bëjnë të aksesueshëm mësimin online tek të gjithë, pasi ky është vërtet një shqetësim i madh, veçanërisht në Shqipëri, ku jo të gjitha familjet kanë akses në internet.
Gjatë pandemisë së koronavirusit, të paktën një miliard nxënës në mbarë botën kanë mbetur larg arsimit. Sekretari i përgjithshëm i OKB-së, Antonio Guterres, në një video-mesazh të publikuar theksoi se në mbarë botën janë privuar nga arsimi parashkollor mbi 40 milionë fëmijë.
Por a duhet të rihapen shkollat?
Rihapja e shkollave është një çështje që gjithmonë lidhet me situatën e pandemisë në vend. Dhe teksa numri i të infektuarve dhe i viktimave po rritet ndjeshëm dita ditës, mësimi online duket si mundësia e vetme që kanë nxënësit apo studentët në vend.
Një shembull mjaft i nevojshëm na vjen nga Izraeli, një nga vendet e para që rihapi shkollat dhe vuajti pasojat. E bindur se e kishte mposhtur koronavirusin dhe e dëshpëruar për të rindërtuar një ekonomi të shkatërruar, qeveria izraelite ftoi të gjithë studentët në klasa në fund të majit.
Brenda disa ditësh, infeksionet në një shkollë të mesme në Jeruzalem, u përhapën si kërpudhat pas shiut. Virusi u përhap në shtëpitë e studentëve dhe më pas në shkolla dhe lagje të tjera, duke infektuar përfundimisht qindra studentë, mësues dhe të afërm.
Kjo detyroi qindra shkolla të mbyllen, dhjetëra mijëra studentë dhe mësues të karantinohen.
Dhe a e dini se cila është këshilla e Izraelit për vendet e tjera?
“Përfundimisht nuk duhet të bëni atë që kemi bërë ne”, tha Eli Waxman, një profesor në Institutin e Shkencave Weizmann dhe kryetar i ekipit të Këshillit Kombëtar të Sigurisë së Izraelit për pandeminë.
Hapja e shkollave sipas tij, “ishte një dështim i madh”.
/iconstyle.al
