Ditën e sotme, Instituti Europian Pashko dhe gazeta ‘Mapo’ shpallën për këtë vit, listën e 10 personave më të pasur në Shqipëri për vitin 2016. Në studimin e tyre janë përfshirë 100 sipërmarrës shqiptarë, të cilët janë analizuar në bazë të të dhënave që ata kanë dorëzuar në Qendrën Kombëtare të Biznesit.
Por mes emrave të njohur të biznesmenëve meshkuj që kryesonin listën, ishte edhe sipërmarrësja Vilma Nushi, e cila është renditur në vendin e nëntë të listës. Kush është Vilma Nushi?
Nushi njihet si një nga sipërmarrëset më të mira dhe më me përvojë në vend, që ka në pronësi Monitor Marketing&Distribution, ndër kompanitë më të mëdhatë në fushën e distribucionit.
Duke marrë në konsideratë periudhën e gjatë që ka në biznes, aktivitetin e qëndrueshëm dhe numrin e të punësuarve, znj. Nushi është realisht sipërmarrësja më e madhe femër në biznesin shqiptar, ndonëse sipas xhiros vjetore renditet sërish e dyta në 2014-2015, me një qarkullim vjetor përkatësisht 13.2 dhe 11.2 miliardë lekë.
Kompania ka mbi 300 të punësuar, sipas të dhënave nga tatimet. Në vitin 2014, norma e fitimit të M&D ishte 2%, tipike e sipërmarrjeve të mëdha shpërndarëse. Sipas Monitor, Znj. Nushi rezulton aksionere dhe në subjekte të tjera si një depo farmaceutike, e krijuar në 2004-n, me 50% të aksioneve, duke realizuar një qarkullim vjetor prej 977 milionë lekësh, duke figuruar edhe e 17-a në listën e kompanive me pronare femra.
