Rastet e dhunës, kërcënimeve apo sulmeve ndaj gazetarëve në Shqipëri janë të panumërta. Historia ka treguar se gazetaria e paanshme, fjala e lirë, dhe siguria e gazetarëve ka qenë gjithnjë e kërcënuar.
Nisur nga sulmi i pashembullt që iu bë sot gazetares Klodiana Lala, shtëpia e prindërve të se cilës u qëllua me breshëri plumbash, “iconstyle.al” risjell në vëmendje të gjitha herët kur gazetarët në Shqipëri janë sulmuar për ushtrimin e profesionit të tyre.
Klodiana Lala
Shtëpia e familjes së Klodiana Lalës u qëllua me breshëri automatiku sot në orët e para të mëngjesit. Fatmirësisht gazetarja nuk ndodhej në banesë, por prindërit e saj, vëllai dhe dy vajzat minorene po. Ato rrezikuan jetën dhe janë terrorizuar nga ky sulm që ndodhi për shkak të ushtrimit të detyrës së gazetares.
Artan Hoxha
Artan Hoxha është kërcënuar gjithashtu me jetën e tij dhe të djalit për shkak të detyrës. Rasti i parë i bërë publik ka qenë ai në 2011-n, kur Artan Hoxha ka marrë një zarf kërcënues me dy plumba, të njëjtët me të cilët u ekzekutuan tre personat gjatë demonstratës së opozitës më 21 janar. Në vitin 2015, Hoxha ka marrë kërcënime në telefon për shkak të deklaratave publike mbi laboratorin e kokainës në Xibrakë të Elbasanit. Autorët e mesazhit kërcënues e kanë kërcënuar me jetën e djalit dhe më pas të vetë gazetarit Hoxha. Rasti i fundit i bërë publik, ka qenë ai i vitit 2017, kur Artan Hoxha denoncoi nga studio e emisionit “Studio e Hapur” në “News24” se është kërcënuar me jetë nga bandat e Elbasanit.
Elvi Fundo
Gazetari Elvi Fundo është dhunuar në vitin 2017, pranë Stacionit të Trenit në Tiranë. Ai nuk arriti dot t’i identifikojë autorët e sulmit, pasi u qëllua nga pas, por dyshimet lidhen me shkrimet e tij në lidhje me disa trafikantë droge me emra të ndryshuar që sipas tij, janë pronarë mediash.
Aurora Koromani
Në 2015-n Aurora Koromani është kërcënuar me jetë nga ISIS. Kërcënimi mbërriti në redaksinë e televizionit “News 24” nga një person i panjohur. Në tekst shkruhej: “Aurora Koromani ka me kenë e vrarë dhe juve ka me ju dënu Allaku”. Jo vetëm kaq, por personi që dërgoi mesazhin, telefonoi edhe në numrin e redaksisë, por nuk foli për 9 sekonda.
Gentian Bellaj
Në 2014-n, gazetarit të “Ora News”, iu dogj makina, gjë që besohet të ketë qenë një zjarrvënie e qëllimshme. Makina ishte parkuar në një rrugicë në afërsi të shtëpisë së tij private në lagjen “Lirim”, rruga “Petrit Bisha. Vetë Bellaj kishte deklaruar në atë kohë se dy net më parë kish parë, rreth orës 00.30, një person pranë makinës së tij, që i kishte drejtuar një dritë çakmaku apo celulari në fytyrë. Kjo ishte hera e dytë që gazetarit Gentian Bellaj i digjej makina, pasi edhe një tjetër i është djegur për shkak të detyrës në 19 shkurt të vitit 2011.
Eduard Ilnica
Gazetari Eduard Ilnica u dhunua barbarisht më 10 maj 2016. Ngjarja ndodhi rreth orës 22:00 në afërsi të rrethrrotullimit te “Zogu i Zi”, ku Ilnica përfundoi me hematoma në fytyrë për shkak të qëndrimeve kritike të tij kundrejt ekipit të Kastriotit. Sipas Ilnicës, ndër personat që e dhunuan ishte edhe Alban Vogli, presidenti i Kastriotit.
Mero Baze
Të gjithë e mbajnë mend sulmin e vitit 2009, kur gazetari Mero Baze u sulmua dhe u dhunua në mes të Tiranës. Drejtori i të përditshmes “Tema” dhe drejtuesi i një emisioni investigativ televiziv, ishte në shoqërinë e disa miqve të tij në njërin prej lokaleve në qendër të Tiranës kur fillimisht është ofenduar me sharje e fyerje dhe më pas është dhunuar. Pas kallëzimit penal nga Mero Baze për ushtrimin e dhunës, policia ndaloi dy nga truprojat e biznesmenit Rezart Taçi, emri i të cilit ishte lakuar shpesh në emisionin investigativ.
Arbana Xharra
Kryeredaktorja e gazetës “Zëri”, Arbana Xharra, ka rënë gjithashtu pre e kërcënimeve për shkak të detyrës. Autorët i kanë lyer me bojë të kuqe si gjaku muret jashtë banesës së saj në Xharrë të Prishtinës. Të njëjtën gjë kishin bërë edhe në parkingun e banesës së saj, ku ajo zakonisht parkon automjetin.
Në 2017-n, gazetarja Arbana Xharra, u dhunua fizikisht dhe u dërgua në gjendje të rëndë në spital.
Genci Angjellari
Gazetari i STOP-it është dhunuar gjatë ushtrimit të detyrës. Ai po investigonte situatën e hedhjes së mbetjeve spitalore nga kompania e dezinfektimit dhe riciklimit të mbetjeve të rrezikshme “Euroteam”, por administratorja Mirela Topulli, e gjendur ngushtë përpara pyetjeve të gazetarit e ka dhunuar këtë të fundit, ndërkohë që kamera xhironte.
Gerti Xhaja
Në vitin 2014 gazetari Gerti Xhaja dhe grupi i tij i xhirimit u sulmuan me armë, u rrëmbyen dhe u mbajtën për 15 minuta peng për shkak të raportimeve për fshatin kultivimit dhe përpunimit të drogave, Lazarat. Përpos kësaj, persona të paidentifikuar hodhën një bombë në banesën e tij në Lushnje. Të gjitha këto e detyruan gazetarin që t’i bashkohej kolegëve të tjerë të larguar nga Shqipëria për shkak të kërcënimit të jetës.
Parim Olluri
Drejtori i Gazetës Insajderi, Parim Olluri, është sulmuar fizikisht në 2017-n. Ai pësoi lëndime të lehta trupore. Në momentin e sulmit, Olluri ka qenë i shoqëruar nga bashkëshortja e tij, e cila ka humbur ndjenjat nga pamja e frikshme dhe dhuna e ushtruar mbi partnerin e saj.
