Dua Lipa dhe ekipi i saj janë të shqetësuar se albumi i saj i tretë mund të qarkullojë në internet përpara se ajo ta publikojë.
Shefat e kompanisë diskografike të këngëtares po përpiqen dëshpërimisht të sigurojnë që regjistrimet për këngët e albumit të jenë të sigurta e të mos dalin para kohe. Ky shqetësim vjen pasi një këngë me të cilën ajo ka punuar me Pharrell Williams u bë publike këtë javë në internet.
Një burim tha për rubrikën Bizarre të gazetës The Sun: “Gjatë muajit të kaluar shumë demo dhe këngë të refuzuara nga Dua janë shfaqur në internet. Është e bezdisshme pasi ata nuk e bënë albumin për një arsye, por padyshim që shqetësimi kryesor është të dimë nëse albumi i saj i tretë e ka radhën të bëhet publik para kohe’.
Edhe albumi ‘Future Nostalgia’ doli disa ditë përpara se ajo ta bënte publike, e kjo e shkatërroi Dua-n, shkruan ‘Mcdowellnews‘.
Artistja është duke kontaktuar kompaninë e saj të regjistrimit dhe po përpiqet të zbulojë se kush po tenton të bëjë të njëjtën gjë përsëri. Artistja gjithashtu e ka bërë të qartë se asnjë nga këngët e saj nuk ka leje të zbulohet para datës së publikimit.
Këngëtarja me origjinë shqiptare zbuloi në muajin dhjetor se albumi i ri do të jetë “shumë ndryshe” nga albumet e mëparshme e se do t’i kalojë pritshmëritë.
