“Në minutën e parë që arrin (në Shqipëri) jepi puthjen e mirupafshim kuletës. Jo sepse do të ta vjedhë dikush, por sepse… nuk do ta lërë askush që ta përdorësh. Shqiptarët njihen si ndër njerëzit më bujarë në planet dhe ky stereotip është i vërtetë”.
Nis kështu përshkrimi i Nuseir Yassin, blogerit arabo-izraelit, i cili krijon video gjatë udhëtimeve të tij anembanë botës dhe i publikon ato në Facebook në faqen “Nas Daily”.
Ai erdhi këtë muaj në Shqipëri për t’u njohur dhe për të realizuar videon më të paparë në vendin tonë, ku për përfundimin e tij kërkoi ndihmën e të gjithë shqiptarëve.
Në video ai nuk ka përmendur vetëm bukurinë e vendit tonë, por disa karakteristika që e bëjnë të veçantë Shqipërinë.
“Nuk ka konflikte për fenë. Nuk mund të thuash kush është musiman apo i krishterë. Nuk ka rëndësi, për ata të gjitha fetë janë njësoj”, thotë Nuseir në minutën që zgjatë 3:33 minuta.
Ai e vë theksin te natyra dhe çmimet e lira që gjeni kudo në vendin tonë:
“Ajo që nuk është njësoj, është natyra. Pa ekzagjerim, pa zbukurime, pa gënjeshtra, natyra është e mrekullueshme. Është si Zvicra me 10% të çmimeve të saj. Shqipëria është shumë e lirë”.
Nuseir vazhdon të tregojë se shumë njerëz nuk vijnë në shtetin shqiptar për shkak të stereotipave, si diktatura, korrupsioni dhe lufta civile.
Vëmendjen e blogerit e tërheqin bunkerët, ku në vendin tonë gjenden 170.000 të tillë.
“Ajo që harrojnë njerëzit është se, në Shqipëri dhe shumë shtete të tjera gjërat përmirësohen dhe stereotipat vdesin! Nuk ka më luftë civile apo diktaturë. Bunkerët ose janë zhdukur ose janë kthyer në art. Korrupsioni është në ulje, siguria është në rritje. Dhe Shqipëria është gati të bëhet pjesë e Bashkimit Evropian dhe të hapet për më shumë turistë. Nëse i lë mënjanë stereotipat, do të gjesh një vend si Shqipëria me natyrë të pabesueshme, kulturë, çmime dhe njerëz që mund t’i quash shok, që ndryshe nuk do t’i takoje kurrë”, shprehet drejt përfundimit të klipit blogeri.
Ai qëndroi përreth një javë në vendin tonë, duke pranuar ndihmën e të rinjve për informacionet pikante të Shqipërisë apo dhe për video interesante.
Burimi: Iconstyle.al
