Në një kohë që të gjithë jemi bërë dëshmitarë të çmimeve të kripura të paketave që ofron një prej operatorëve celularë më të mëdhenj në vend, Vodafone Albania, ky i fundit ka bërë një lajmërim të ri për një investim që thuhet se do të ndryshojë rrënjësisht cilësinë e shërbimeve fikse dhe TV për klientët shqiptarë.
Plot 500 milionë euro është shifra e majme që operatori celular ka njoftuar se do të investojë në infrastrukturën e rrjetit, pasi ka hyrë në tregun e telefonisë dhe internetit fiks, duke blerë aksionet e Abcom.
Kompania ka zgjeruar aktivitetin e saj me blerjen e operatorit fiks, ndërkohë që nuk po bën asgjë për t’i faturuar më pak klientët e vet, të cilët, sot që flasim, e kanë tepër të lehtë të verifikojnë se të kushton më shumë Vodafone Albania sesa i njëjti operator në shtetin fqinj, Itali.
Diferenca Vodafone Albania vs Vodafone Italia
Duke marrë parasysh që paga mesatare në Shqipëri është 420 euro, më e ulëta në rajon, ndërsa ajo bruto në Itali është 2560 euro, duhet të themi se është e padrejtë të bësh krahasime, por ja që duhen bërë kur sheh diferencën e madhe mes paketave që ofrojnë dy operatorët.
Shembuj nga Vodafone Italia ka plot (lexo këtu), mjafton të përcaktosh shumën që do të shpenzosh për paketën në muaj, apo javë! Për shembull, me 15 euro në muaj Vodafone Italia të ofron këtë paketë me 60 GB internet, minuta e sms pa limit si dhe me internet pa limit për të përdorur aplikacionet, Tidal, Ëhatsapp, Instagram etj.
Ndërkohë, me Vodafone Gold, që kushton 2200 lekë në muaj, ke 12 GB Internet, 60 Minuta Ndërkombëtare, Minuta dhe sms kombëtare të limituara (3500 Minuta & 400 SMS Kombëtare/Ndërkombëtare) si dhe 3000 SMS me Vodafone Club.
Një ndër operatorët me të ardhurat më të mëdha dhe qarkullim vjetor prej 16.3 miliardë lekësh, (sipas të dhënave nga Monitor viti 2018), ka thelluar humbjet në vitet e fundit, si pasojë e rënies së të ardhurave nga shërbimet zanore (voice) dhe konkurrencës që po vjen nga teknologjia.
Dhe nëse Vodafone Albania do që të investojë në tregun shqiptar 500 milionë euro, më e pakta që mund të bëjë është të jetë transparent me investimet, të përcaktojë qartazi kategoritë se ku do të investojë, që nga investimet në infrastrukturën e rrjetit e deri te reklamat, apo burimet njerëzore.
Po çfarë ndodh me blerjen e Abcom nga Vodafone Albania?
Sipas Monitor, duke qenë se shoqëria VFAL siguron pjesën më të madhe të të ardhurave nga shërbimet e komunikimeve elektronike dhe zotëron pozitë dominuese në tregun e komunikimeve elektronikë në rrjetin celular, mendohet që ky transaksion do të ketë impakt në tregun e komunikimeve elektronike dhe kryesisht në tregun e komunikimeve në rrjetet fikse.
“Ky transaksion shënon ndryshime të strukturës dhe konkurrencës së tregjeve të shërbimeve telefonike dhe sidomos të broadbandit nga rrjetet fikse ku tashmë Telekom Albania dhe Albtelecom që veprojnë në të dyja këto tregje do të ndjejnë më fort konkurrencën e Vodafone në të dyja tregjet, celulare dhe fikse”, shkruan Monitor.
Shpresojmë që me rritjen e konkurrencës, operatorët të ofrojnë oferta ose ulje të çmimeve të paketave fikse dhe atyre celulare.
Rritja agresive në treg, barrierë për çdo hyrës të ri
Operatori Vodafone Albania është licencuar si operatori i dytë kombëtar i shërbimit celular në Shqipëri më 9 Qershor 2001. Të dhënat më të fundit nga AKEP për tremujorin e dytë të vitit 2019 tregojnë se Vodafone mbetet lider në tregun celular, me 49 % të tregut pasi zotëron 1 milionë e 204 mijë përdorues aktivë, nga 2,460,718 që është numri total i përdoruesve celularë.
Sipas analizës së tregut nga AKEP, dalja nga tregu e operatorit Plus Communication e ndryshoi strukturën e tregut duke rritur ndjeshëm kapacitetet konkurruese nëpërmjet dy operatorëve më të mëdhenj, dhe duke krijuar një barrierë të konsiderueshme për çdo hyrës të ri në treg.
“Tregu me pakicë celular ka probleme të konkurrencës, ku Vodafone Albania ka pjesë tregu mbi 50% për shumë tregues dhe në treg vihet re aplikimi i tarifave nën kosto, të cilat ndikojnë negativisht në qëndrueshmërinë e konkurrencës midis operatorëve, rrezikun për dalje të tjera nga tregu si pasojë e tarifimit agresiv dhe zbatimit të tarifave të pakicës nën kosto (margin squeze), të cilat vlerësohet të kenë ndikim negativ në konkurrencën potenciale nga rrjetet virtuale MVNO dhe në përfitimet e përdoruesve të këtyre shërbimeve në periudhë afatgjatë”.
“Kjo nënkupton se përveç barrierave financiare, teknike dhe juridiko-procedurale për hyrjen në treg, dalja nga tregu e hyrësit e Plus Communication, solli një barrierë të konsiderueshme për çdo hyrës të ri në treg”, vijon Monitor.
/Iconstyle.al
