Ministrja e Arsimit Besa Shahini bëri me dije se mësimi në gjithë Shqipërinë, përveç qarqeve që janë në gjendje emergjence, fillon që nesër, në 2 dhjetor.
Ndërkohë që për Tiranën dhe Lezhën, në datën 5 dhjetor parashikohet nisja e mësimit, por që më e detajuar do të thuhet në datën 4 dhjetor.
Ndërkohë në qarkun e Durrësit, më i prekur nga tragjedia, mësimi do të nisë në 9 dhjetor, edhe për këtë, do të ketë një njoftim të dytë.
Besa Shahini:
“Sot me propozimin tim mori këtë vendim, në qarkun e Durrësit, Durrës, Krujë, Shijak deri në 9 dhjetor pezullohet mësimi. Në qarqet Tiranë, Vorë, Kamëz Kavajë, Rrogozhinë, në qarkun e Lezhës, Kurbin, Mirditë deri në datë 5 dhjetor por ruajmë mundësinë që ta shtyjmë edhe për disa ditë të tjera nëse nuk jemi të sigurt që janë në gjendje të duhur. Do e bëjmë njoftimin me datën 4 dhjetor”.
“Mësuesit duhet të dalin në punë përpara se të vijnë nxënësit në mënyrë që të përgatisin gjithë procesin e rifillimit të mësimit.
Ky vendim për rifillimin e mësimit vlen vetëm për nxënësit. Mësuesit i presim në punë duke filluar nga nesër, me një fleksibilitet me mësuesit e qarkut të Durrësit që ndoshta jo të gjithë mund të paraqiten në shkolla.
Në shkollat që po riparohen mësuesit do takohen në një shkollë tjetër të afërt.
Drejtorët e shkollave të marrin informacion nga bashkitë respektive të marrin informacion nëse shkolla mund ti hapë dyert nesër për takimin e mësuesve dhe të planifikojë takimin në shkollën më të afërt.
Kjo është e domosdoshme të bëhet për përgatitjen e rifillimit të mësimit. Paraqitja e mësuesve në shkollë nesër nuk është opsionale dhe zyrat vendore arsimore monitorojnë gjithë procesin e këtyre takimeve që do bëjnë mësuesit në shkollat respektive.”
