Të gjitha mediat në vendin tonë ditën e sotme u pushtuan nga lajmet për rikthimin në atdhe të katër fëmijëve dhe gruas së parë nga kampi i Al-Holit në Siri. Gjysmëhëna e Kuqe siriane në bashkëpunim me autoritetet vendase kanë mundur që të kthejnë në vendlindje Floresha Rashën dhe tre fëmijët e saj, Amar, Emel dhe Hatixhe.
Bashkë me ta u rikthye edhe Endri Dumani, i cili tanimë i ka mbushur 12 vjeç. Sakaq, mbetet ende mister fati i motrës së tij, Evës, e cila nuk pranoi që të kthehej në Shqipëri nga frika se nëse do të kthehet në atdhe do e çojnë në jetimore!
Ndërkohë, kritika të shumta ka marrë qeveria, e cila ka shfrytëzuar rastin për show mediatik. Në vend që të përqëndrohej plotësisht te personat e rikthyer, të cilët kanë jetuar për vite në “ferrin” e Al-holit mes bombave, tymit, baltës, mungesës së familjes dhe një jete normale, qeveria shfrytëzoi çdo mundësi për ta shitur këtë ngjarje si një meritë të sajën.
Por, cili është në të vërtetë roli i saj në këtë histori?
Diçka u kuptua qartë. Kryeministri Edi Rama u mundua të kthehet në heroin televiziv të shpëtimit të të riatdhesuarve nga kampi famëkeq. Ai u shpreh se ka një vit që bëjnë përpjekje, por në fakt përgatitjet për këtë riatdhesim kanë vetëm një muaj që kanë nisur, madje u nxitën nga protesta tek Kryeministria e të afërmve të fëmijëve të mbetur në Siri.
Për më tepër, mëngjesin e të martës Drejtori i Sigurisë pranë Institutit të Marrëdhënieve Ndërkombëtare, Kosovë, Bedri Elezi në një intervistë për “Abcnews” tha se kampi do të zbrazet, duke theksuar se tërheqja e shtetasve të huaj që ndodhen në kampin Al Hol është dhe një presion nga ana e autoriteteve kurde.
“Kampi Al Hol do të mbyllet së shpejti dhe të gjithë personat që ndodhen aty do të shkojnë një një kamp tjetër, që njihet si Roi. Autoritetet kurde nuk kanë mundësi ekonomike që ta mbajnë hapur kampin Al Hol. Kjo është një rrugë që është ndjekur dhe më parë nga autoritetet kurde, për të kthyer në vendet e tyre gratë dhe fëmijët e ngelur në Siri. Theksoj se ka qenë një kërkesë ndaj shteteve që kanë banorë në këtë kamp, dhe Shqipëria është përgjigjur kësaj kërkese, ne kemi ndihmuar në lehtësimin e kontakteve me autoritetet kurde që kanë dhe kampin nën kontroll.
Është një presion nga ana e autoriteteve kurde ndaj shteteve për të marrë shtetasit e tyre, pasi ka dhe raste që personat kanë shtetësi të huazuar siç është Franca dhe ato u kanë lënë shtetësinë duke mos iu përgjigjur më.”
Kur fëmijët përdoren për interesin më të lartë të qeverisë!
Në bazë të gjitha legjislacioneve kombëtare dhe ndërkombëtare që në fokus kanë mbrojtjen e të drejtave të fëmijëve përfshihen disa parime bazë që mediat duhet të kenë në vëmendje dhe të respektojnë me rigorozitet gjatë punës së tyre, ku ndër të tjera përmendet edhe mbrojtja e privatësisë së fëmijës dhe respektimi i jetës private, familjare, banesës, e korrespondencës.
Kodi i transmetimit të mediave audiovizive në Republikën ë Shqipërisë (Nr. 01, datë 27.01.2014) i cili bazohet në Ligjin për Mediat Audiovizive (Nr. 97/2013) dhe Ligjin për mbrojtjen e te Drejtave të Fëmijëve (nr. 10347/ 04.11.2010), përcakton se :
Veprimtaria e transmetimeve audiovizive respekton në mënyrë të veçantë të drejtat, interesat dhe kërkesat morale e ligjore për mbrojtjen e të miturve.
Për më tepër :
Intervistimi i fëmijëve duhet të bëhet me praninë ose të paktën me dijeninë e përfaqësuesit të tij ligjor ose një personi të caktuar prej tij.
Fatkeqësisht, asnjë nga këto pika nuk u mor parasysh nga vetë kryeministri dhe qeveria, të cilët shfaqën pa më të voglin hezitim pamje të pafundme nga kthimi i katër fëmijëve jo vetëm në rrjetet sociale por edhe në ERTV. Qeveria duhet të ishte shqetësuar së pari për sigurinë dhe shëndetin e tyre fizik dhe mendor. Fakti që prej vitesh kanë jetuar një jetë aspak normale ka shkaktuar në shëndetin e tyre probleme të shumta, që nuk presin për show-in e qeverisë.
Në vend të ‘ceremonive’ të tepërta dhe të panevojshme, ata duhet t’i shoqëronin fëmijët në një mjedis më të specializuar dhe të integroheshin menjëherë në strukturat e posaçme. Në vend të kameramanëve dhe fotografëve të pafund të ERTV, nevojitej shumë më shumë një psikologe, pasi gjendja e rënduar e fëmijëve reflektohet qartë.
Kjo sjellje do ishte të mendosh në ‘interesin më të lartë të qyetarëve’. Por ‘interesi më i lartë i qeverisë’ është shumë më i fortë për ta lejuar këtë rast t’i ikë nga duart. Fakti që propaganda dhe show televiziv shihen si gjëja më me interes në sytë e qeverisë tregon për një mangësi të madhe në funksionimin e saj.
Kthimi i gjithçkaje në një show, që synon thjesht të manipulojë votuesin, sidomos këto muaj para zgjedhjeve, shkon në të njëjtën linjë me ‘interesin më të lartë të qeverisë’, që përdor çdo mënyrë, përfshirë edhe shkeljen e ligjit, dhe gjithkënd për propagandë.
