Mashtrimet me dyqanet online në Shqipëri janë një fenomen nga i cili duhet të kenë kujdes të gjithë ata që preferojnë të blejnë nga shtëpia.
Rastet kur faqe të paverifikuara online bëjnë mashtrime me çmimet, origjinalitetin e mallit dhe eksluzivitetin e tij janë të shumta dhe raportohen edhe në rrjetet sociale. Ka mjaft dyqane online që mund të verifikohen për cilësinë, besueshmërinë dhe origjinalitetin e mallit. Por ka dhe shumë të tjera që punojnë në të zezë dhe mundohen të përfitojnë.
Mjafton të hysh në Instagram për të parë aty me dhjetëra dyqane online që reklamojnë produkte me çmime dyfish apo më shumë, nga një tjetër faqe online jashtë Shqipërie. Rasti i mëposhtëm i denoncuar nga faqja “Dallavere.shop”, është një shembull se sa kujdes duhet të keni për të verifikuar produktet apo rrobat e shitura online.
Shitja e xhupit me çmimin dyfish më të lartë është denoncuar nga një blerëse e rregullt e cila shkruan: “Se di ku ta marr (xhupin) te ky dyqan gjakpirës apo të Aliexpress, jam shumë konfuze, e theksoj është transporti falas”.
Në një rast të dytë, blerësja ankohet për çmimin e një palë çizmeve që shiten 55 mijë lekë por që shiten 28 mijë në një dyqan në Shqipëri.
