Kushdo që dëshiron të shkëputet nga monotonia e një jave të lodhshme pune, një ndër destinacionet që duhet të vizitojë është Kepi i Rodonit në Durrës. Me një largësi prej 50 km nga qyteti i Tiranës dhe një udhëtim që zgjat me makinë rreth një orë, ju mund të kaloni një fundjavë relaksuese larg zhurmave dhe stresit të përditshëm.
Për më shumë kliko në Welcome Albania
Po ku ndodhet Kepi i Rodonit?
Ai është një rrip toke në formë gadishulli që futet në brendësi të detit Adriatik. Shtrihet në formë trekëndëshi midis gjirit të Rodonit në veri dhe atij të Lalzit në jug.
Në veri të tij derdhet lumi i Ishmit një nga lumenjtë e vegjël të Shqipërisë. Kepi i Rodonit është kepi më i madh në vendin tonë, i cili mbyll nga ana e jugut gjirin e Drinit.
Paralel me bregun e tij shtrihen kodra argjilore, të cilat dallohen nga format e rrumbullakëta që e rrethojnë krejt kepin. Një pjesë e tyre mbulohen nga pyje të vogla duke krijuar dy ngjyra çlodhëse: të kaltrën e detit dhe të gjelbrën e bregut.
Por çfarë na ofron Kepi i Rodonit?
Ai është një destinacion që ndërthur bashkë turizmin bregdetar dhe atë historik. Një natyrë e mrekullueshme ku e gjelbërta ndërthuret me blunë e detit dhe lashtësia me freskinë.
Ka një hapësirë 40 km plazhe, dhe në të ndodhen 2 kala: Kalaja e Skënderbeut e ndërtuar në vitin 1452 dhe kalaja e Ishmit me një pamje të mrekullueshme nga deti.
Një vijë bregdetare shumë afër me Ulqinin dhe në kohët e lashta përdorej për tregtinë e mallrave.
Thuhet se Skënderbeu e përdorte këtë zonë për të kaluar momentet relaksuese me bashkëshorten dhe me motrën e tij, madje përflitet se dhe muajin e mjalti e ka kaluar në këtë zonë të mrekullueshme.
Po kaq interesante është edhe Kisha e Shën Andoit, një monument kulture e restauruar, e cila përdoret shumë edhe nga çiftet e reja për të realizuar fotot e dasmës së tyre.
Çfarë mund të bëjmë gjatë kësaj fundjave tek Kepi i Rodonit?
Ndërkohë që parashikohet të jetë një fundjavë me diell, me temperatura që varjojnë nga 11-26 gradë, Kepi i Rodonit, si një zonë e virgjër që është mund të shfrytëzohet nga familjarët, çiftet e reja, apo dhe grupet shoqërore për të marrë rrezet e para të dielli, pse jo edhe për zhytje, megjithëse uji ende është shumë i ftohtë.
Për të apasionuarit pas peshkimit, kjo është zona perfekte që ofron mundësi për të ushtruar sportin tuaj.
Një piknik në kodrat që shtrihen buzë bregut të detit është ideale. Të shumtë janë turistët shqiptarë dhe të huaj që zgjedhin të bëjnë piknik në këtë zonë dhe për më tepër po aq aventureske është të kalosh natën në këtë zonë të bukur duke marrë me vete një çadër kampingu.
Vizitimi i dy kalave dhe kishës është një aktivitet tjetër që mund të bëni në këtë zonë të mrekullueshme ku qetësia relaksuese të bën që të mos duash që dita të përfundojë.
Kepi i Rodonit shfrytëzohet nga turistë nga e gjithë bota për ecje (Hiking) kështu që dhe ju mund të bëheni pjesë e tyre.
Gjatë verës në këtë zonë bregdetare organizohen edhe kampingje ku mund të bëheni pjesë së bashku me shoqërinë tuaj, apo me familjen.
Çfarë duhet të merrni me vete?
Natyrisht që rrobat e banjës nuk duhet të mungojnë asnjëherë, mjetet e peshkimit po ashtu, një zgarë dhe ushqimet tuaja të preferuara.
Nëse do të kaloni natën padiskutim ju duhet një çadër kampingu pasi nuk ka hotel. Ju pihet një kafe apo pije freskuese, merrini me vete sepse lokalet mungojnë në këtë zonë, e cila është tërësisht e virgjër dhe ideale për tu relaksuar.
