Shqipëria është e bukur në çdo centimetër të saj, por jo të gjithë kemi pasur mundësinë që ta eksplorojmë .Të shumta janë ato vende, të cilat njihen si të virgjëra dhe që çdo ditë e më shumë po shndërrohen ne destinacionet turistike më të preferuarat nga të huaj.
Në kuadër të rubrikës “Ku të shkojmë këtë fundjavë”, “Iconstyle.al” iu sugjeron që të vizitoni Liqenin e Komanit. Një eksperiencë e bukur që do ta mbani mend gjatë gjithë jetës dhe do t’iu duket vetja sikur jeni në Tajlandë.
Foto marrë nga @Natalia
E dini ku ndodhet?
Liqeni i Komanit është një port i vogël në Fierzë të Bajram Currit. Ai është ndërtuar fillimisht si një liqen artificial për furnizimin me ujë të hidrocentralit të Komanit, por që prej vitit 2000 ai filloi të përdorej edhe për udhëtime ujore për të lidhur qytetin e Bajram Currit dhe Gjakovës me pjesën tjetër të vendit.
Udhëtimi nga Tirana në drejtim të Tropojës, zgjat afërsisht tetë orë dhe përshkohen rrugë që kalojnë në tokë dhe në liqen. Itinerari që ndiqet zakonisht për të shkuar tek liqeni i Komanit kalon nëpër rrugën kombëtare Tiranë-Shkodër, kthen në Bushat dhe vazhdon në Mjedë-Vau i Dejës-Koman-Fierzë. Një pjesë të rrugës, Koman –Fierzë bëhet me traget dhe më pas vazhdohet drejt Bajram Currit. Oraret e tragetit janë 6 dhe 9 e mëngjesit. Megjithatë, për 90 euro në total (5 euro personi) varka me rreth 20 vende vihen në dispozicion të vizitorëve për të shijuar nga afër pikat interesante të liqenit të Komanit.
Kjo është një rrugë mjaft interesante që të jep mundësinë të eksplorosh vende të panjohura dhe të jesh në kontakt të vazhdueshëm me natyrën.
Ndërsa nëse nuk dëshironi të udhëtoni me traget mund të ndiqni një itinerar të dytë që është vetëm rrugë tokësore. Rruga fillon duke ndjekur itinerarin e parë deri në Milot, më pas rrugëtimi ndahet për të hyrë në rrugën që të çon drejt qytetit të Pukës. Nëpërmjet këtij qyteti kalon në Malësinë e Mirditës dhe vazhdon drejt veriut, pranë Kukësit dhe ndahet në drejtim të Tropojës.
Itinerari i dytë, i cili njihet si rruga e Qafës së Malit mund të zgjasë 7 orë, ndërsa i pari duke qenë se ka dhe udhëtim me traget zgjat 8 orë.
Video marrë nga @zandazarina
Çfarë na ofron liqeni i Komanit?
Mund të themi se aventurat fillojnë që në momentin që ju do të niseni për të shkuar drejt liqenit të Komanit. Një itinerar i mbushur plot me surpriza të bukura dhe që të mban në kontakt me natyrën gjatë gjithë kohës.
Një shëtitje e paharruar mes shkëmbinjve të thepisur, shpateve me gjelbërim dhe luginave mahnitëse.
Pasi të keni arritur tek liqeni i Komanit do të shikoni se pamja që iu ofrohet është mbresëlënëse. E izoluar nga majat e larta, si dhe rrjedhja e vrullshme e ujërave të kaltra iu ofron aventurierëve një panoramë nga ato që ngjajnë me Tajlandën e largët.
Ky rajon, veç vlerës turistike, ruan edhe vlera historike. Aty pranë ndodhet fshati Koman, ku është zbuluar një varrezë e shekullit IV-VIII, e cila lidhet me kulturën e shoqërisë së hershme shqiptare.
Foto marë nga @Natalie Lyon
Çfarë mund të bëjmë gjatë kësaj fundjave tek liqeni i Komanit?
Liqeni i Komanit është njëri ndër vendet më të bukura dhe që më së shumti i’a vlen të vizitohen në Shqipëri, për ujërat dhe natyrën e veçantë. Së pari do të keni mundësinë të bëni një udhëtim në ujarët e liqeneve Fierzë-Koman që zgjat 3 orë dhe do t’iu ofrojë një panoramë mbresëlënëse.
Foto marrë nga Youtube
Udhëtimi me traget apo me ndonjë barkë më të vogël ofron kënaqësi të pa përshkruar, ndërsa atraksion në vete janë fshatrat e kësaj zone dhe grykat e disa lumenjve që derdhen në liqen.
Ju mund të merrni edhe rezet e para të diellit pranë liqenit të Komanit. Ju sugjerojmë që të jeni tepër të kujdesshëm nëse do të zgjidhni të notoni në ujërat e gjelbërta të këtij liqeni sepse është shumë e rrezikshme.
Mund të vizitoni edhe varrezat e shekullit të IV-VIII, për t’u informuar rreth kulturës së shoqërisë së hershme.
Turistët që dëshirojnë të kalojnë natën në këtë zonë mund të shfrytëzojë shtëpitë e banorëve përreth, të cilat tregohen mjaft mikpritëse për turistët. Kjo do t’iu jap mundësinë që të njiheni edhe me zakonet dhe traditat e kësaj zone.
Foto marrë nga @scropiaalbania
Çfarë duhet të marrim me vete?
Në këtë udhëtim duhet të siguroheni që të merrni me vete ujë dhe ushqime sepse është një rrugë relativisht e gjatë.
Duke pasur parasysh lartësinë e madhe dhe rrezet e diellit bien pingul ju do të jeni të ekspozuar ndaj diellit në çdo moment ndaj i’u sugjerojmë që të merrni me vete kapele dhe krem plazhi. Rrobat e plazhit natyrisht që nuk mund të mungojnë.
Nëse nuk doni ta kaloni natën në shtëpitë e banorëve që ndodhen përreth duhet të merrni me vete çadra kampingu dhe sigurohuni të merrni veshje të trasha sepse mbrëmja është shumë e ftohtë.
Foto marrë nga Albania Tour
