Sipas parashikimeve më të fundit të motit pritet që pas kësaj fundjave temperaturat do të ulen dhe do të lëmë pas krahëve të nxehtin përvëlues.
Ndërkohë që pritet që gjatë kësaj fundjave temperaturat do të jenë relativisht të larta, të gjithë kemi filluar të mendojmë se çfarë do të bëjmë apo ku do ta kalojmë atë.
“Iconstyle.al” si çdo fundjavë ju vjen në ndihmë dhe ju sugjeron të vizitoni një ndër destinacionet më të bukura të plazheve shqiptare, gjirin e Akuariumit.
Foto marrë nga @kosovogirltravels
Ku ndodhet ai?
Gjiri i Akuariumit, apo siç njihet ndryshe plazhi i Akuariumit, ndodhet në gjirin e Jalës dhe konsiderohet si një ndër perlat e bregdetit tonë. Deri në Jalë, tek pjesa e kampingut shkohet me makinë, ndërsa pjesa tjetër është një rrugë shumë e ngushtë që mund të përshkohet me makina të mëdha, por që gjithsesi konsiderohet e rrezikshme dhe sugjerohet që të bëhet më këmbë.
Është një segment rrugor më pak se 2 kilometra që mund të përshkohet më këmbë për rreth 7-8 minuta. Nëse keni vështirësi për të gjetur shtegun e duhur mund të pyesni banorët e zonës të cilët janë shumë mikpritës dhe bujar.
Çfarë na ofron kjo zonë turistike?
Plazhi i Akuariumit është një prej atraksioneve më të bukura të jugut të vendit tonë, i cili karakterizohet nga një det me ujë të pastë dhe me një bregdet me gurëza të vegjël të bardhë.
Ai e ka marrë emrin plazhi i Akuariumit, pasi ngjan me një akuarium të madh. Një plazh i virgjër që ka filluar të vizitohet kohët e fundit jo vetëm nga turistët shqiptarë, por dhe të huaj.
Foto marrë nga @feelshem
Ujë i pastër dhe natyra piktoreske që ofron kjo zonë janë një ftesë për të kaluar një fundjavë të paharrueshme.
Foto marrë nga @valter_marashi
Çfarë mund të bëjmë gjatë kësaj fundjave tek Gjiri i Akuariumit?
Duke pasur parasysh temperatura e larta që do të shoqërojnë këtë fundjavë ky është vendi ideal për plazh, ku jo vetëm do të kënaqeni me zhytje në ujin super të pastër, por dhe do të relaksoheni teksa shijoni rezet e diellit.
Foto marrë nga google maps
Kjo zonë ju ofron mundësinë edhe për zhvillimin e sportit të ecjes në kodrat përreth për të gjithë ata që e dashurojnë këtë sport.
Ju gjithashtu do të mund bëni fotot më të bukura që keni realizuar ndonjëherë duke qenë se është një vend piktores.
Foto marrë nga google maps
Çfarë duhet të marrim me vete?
Rrobat e banjës dhe kremrat mbrojtës ndaj diellit janë elementët e parë që ju duhet të merrni me vete.
Mirëpo duke qenë se është një plazh i virgjër në këtë zonë nuk ka lokale apo markete kështu që mos harroni të merrni me vete ushqime dhe pije. Ndërsa nëse dëshironi të kaloni natën këtu një çadër kamping është ajo që ju duhet me patjetër.
Aparati fotografik, apo një telefon me “full battery” nuk duhet të mungojë asnjëherë sepse vetëm kështu do të arrini të fiksoni momente më të bukura që keni kaluar dhe foto me “cool” që do të çmendni gjithë Instagram-in.
Foto marrë nga @visitalbania_
*Kujdes! Ndalohet riprodhimi i këtij materiali pa lejen e redaksisë së Iconstyle.al
