Rastësia thonë se nuk ekziston! Dhe në fakt kur flitet për emisionet e televizioneve tona vështirë që të mendojmë se kjo është arsyeja. Emisioni më i ri i Ermal Mamaqit ne televizionin Klan kishte të ftuar si personazh Bleona Qeretin. Por ndërsa pjesa me e madhe u përqendruan te veshja e saj e ngjashme me Jennifer Lopez, disa të tjerë vunë re një ngjashmëri “të çuditshme” mes skenave të emisionit të Ellen DeGeneres dhe Jimmy Kimmel.
Gjatë emisionit transmetuan edhe dy momente të xhiruara jashtë saj më herët. E para ishte një surprizë e orëve të vona të natës që i bëhej Bleonës në hotelin ku ajo ishte vendosur. Tjetra u realizua në një qendër tregtare ku Ermal Mamaqi dhe Bleona Qereti, duke shfrytëzuar me humor të qenit të famshëm, patën lehtësinë për të marrë gjithçka donin.
Skenat shkaktuan të qeshura, por syri kritik konstatoi se të dyja insertet ishin parë më herët në ekranet amerikane. E para është surpriza që i është bërë Jimmy Kimmel-it me protagoniste këngëtaren Britney Spears, e cila bashkë me balerinët e saj shkon në mesnatë në shtëpinë e prezantuesit për të kënduar këngën e saj më të re “Make me”.
Ndërsa në rastin e dytë është po Britney Spears, e cila bashkë me prezantuesen Ellen DeGeneres shkojnë në një qendër tregtare duke parë se si mund të përfitojë një personazh i famshëm dhe si reagojnë njerëzit e thjeshtë përballë këtij personazhi.
Ndoshta Ermali është frymëzuar nga këto dy moderatorë shumë të famshëm dhe kreativë të ekranit të huaj. Dhe ku ka më mirë se sa të nxitesh nga më të mirët!
Burimi: Youtube
