Me rikthimin në bankat e shkollës, pjesa më e madhe e nxënësve të shkollave 9-vjeçare ndeshen me hartime apo pyetje lidhur me pushimet verore.
Së fundmi, një detyrë e realizuar në klasë është bërë virale, pasi një nxënës i pyetur rreth pushimeve të verës, është përgjigjur se pushimet i ka kaluar në shtëpi, teksa më tej lidhur me lojërat më të bukura për të, ai shkruan se nuk ka asnjë lojë.
Fatkeqësisht, kjo është pasqyra e një pjese të madhe të shoqërisë shqiptare, përtej ‘veljes’ me pushime luksioze që na bëhet në rrjetet sociale.
Nuk do e tepronim nëse do shkruanim se pjesa më e madhe e jona e ka provuar të paktën një herë, ndjesinë e të përgjigjurit të kësaj pyetjeje, kur pushimet i kemi kaluar në shtëpi.
Padyshim koha mund të shfrytëzohet dhe të mbushet me vepra shumë të mëdha, teksa vetëm falë librave mund të udhëtosh kudo në botë e kohë të ndryshme.
E në fakt për të arritur në këtë përfundim duhen vite dhe një fëmijë mund të mos e perceptojë diçka të tillë.
Pasi detyra u bë virale, të shumtë qenë kritikat lidhur me shënimin e mësueses “Përpiqu të shkruash brenda vijave të fletores!”, teksa të tjerë janë të mendimin se kjo pyetje nuk duhet të bëhet më në shkollë.
Por, ç’thonë psikologët për çështjen në fjalë?
Denate Toçe në një prononcim tha për “iconstyle.al” se:
Unë mendoj se nuk ka asnjë gjë që nuk shkon me pyetjen, mjafton që të mos lexohet në klasë me zë të lartë. Edhe mësuesja e ka korrigjuar për shkrimin dhe jo përmbajtjen eventualisht.
Sakaq, shtoi se:
Sigurisht mund të shmangej kjo pyetje duke bërë një pyetje më kreative. P.sh: më thoni një aventurë që keni bërë gjatë kësaj vere. Nëse jo, çfarë, do donit të bënit.
Më tej, Toçe shtoi se një psikolog do të duhet të flasë me fëmijën se duket pak me humor të ulët.
