Ditën e sotme ministrja e Arsimit Evis Kushi ka inspektuar nga afër disa shkolla në qytetin e Durrësit, për të vlerësuar nëse po i zbatojnë masat anti-Covid.
Dhe padyshim këto vizita të ministres u pasqyruan me shpejtësi në rrjetet e saj sociale dhe ajo që mori vëmendje është se gjatë inspektimit në klasa, Kushi ka vënë re një nxënës, i cili nuk kishte vendosur maskën.
Parimisht, nxënësi nuk duhet të ishte lejuar nga mësueset pa maskë, sepse qeveria ka trumpetuar rregulla strike në shkolla. Por, ja një dëshmi e gjallë se rregullat nuk respektohen.
Ministrja ka shkuar vetë tek i mituri dhe i ka kërkuar llogari se përse nuk ka vendosur maskë.
Tani ne do të shkojmë tek djali në fund që nuk ka maskë. Ku e ke maskën? Nuk duhet të rrish në klasë pa maskë, sepse mund ta marrësh virusin dhe mund t’ia çosh mamit, babit apo gjyshes. Kështu që nuk duhet asnjë moment pa maskë. Kështu që ma jep dorën.
Përse ministrja nuk i jep maskat falas ashtu si fqinjët?
Paraardhësja e Kushit, Besa Shahini i dërgoi fëmijët në shkollë në mes të pandemisë e në mëshirë të virusit, por nuk ua siguroi vetë maskat fëmijëve, ashtu siç kanë bërë fqinjët, Italia dhe Greqia në prag të fillimit të vitit të ri shkollor.
Qeveria greke ka vendosur të mbulojë nevojat për maska të të gjithë nxënësve dhe mësuesve përmes autoriteteve lokale, në kontekstin e masave të reja për koronavirusin dhe hapjen e shkollave. Edhe Italia siguroi 11 milionë maska falas çdo ditë për të gjitha shkollat.
Mirëpo, në Shqipëri nxënësit dhe mësuesit janë të detyruar t’i blejnë vetë maskat, që nga ana e tjetër shiten me çmime abuzive, dhe qeveria në vend që t’i rregullojë këto çmime, vendos të luajë “tenderash”.
Ndoshta ministrja Kushi nuk e di, por blerja e maskave dhe dezinfektantëve nga prindërit çdo ditë ose një herë në disa ditë, përkthehet në një kosto më vete, sidomos në këtë kohë kur janë ekonomikisht më të rrënuar se kurrë.
Një maskë kirurgjikale njëpërdorimshe kushton minimumi 50 lekë (të reja), dhe për 5 ditë shkollë një nxënës duhet të shpenzojë të paktën 250 lekë, që në një muaj konvertohen në 1000 lekë. Po ashtu, kësaj kostoje i shtohet edhe xheli me përmbajtje alkooli 60%.
E kjo kosto më pas dyfishohet, trefishtohet etj. në varësi të numrit të fëmijëve për familje.
Ndërkohë, nëse këto maska, që të paktën në eBay kushtojnë 0.15 dollarë, do ishin një kosto tepër e vogël dhe shumë e domosdoshme nëse do mbuloheshin nga shteti.
Kështu, as ministrja Kushi nuk do kishte nevojë të merrej me teatralitete, duke u kërkuar llogari fëmijëve për moskryerjen e detyrës së saj.
