Kryeministri Edi Rama bëri me dije sot se në rast se do të kemi raste me Koronavirus në vend, janë parashikuar dy ambiente ku do të ndërtohen karantinat.
Nga mbledhja e Komitetit Kombëtar të Sigurisë ai u shpreh se vendi i parë do të jetë Konvaleshenca në Durrës, e cila plotëson kushtet dhe standardet për trajtimin dhe izolimin e të prekurve nga Koronavirusi.
Gjtihashtu, kreu i qeverisë u shpreh se Senatoriumi ka kapacitete shtesë për çdo nevojë gjatë një situate kur mund të ketë nevojë për masa shtesë.
“Në asnjë vend karantinat nuk ndërtohen nëpër male, pyje apo larg zonave të banuara. Në rastin e parë të vendosjes së karantinës ne kemi përcaktuar vendosjen e shtëpisë së pushimit të Ushtarakëve në zonën e Durrësit.
Me OBSH është përcaktuar përmbushja e të gjitha kushteve. Në spitalin ‘Shefqet Ndroqi’ ka kapacitete shtesë. Ministria e Shëndetësisë ka nxjerrë urdhrin për masat e shtuara në shkolla. Janë rekomanduar qytetarët të kufizojnë udhëtimet jo të domosdoshme në zonat e prekura”, tha Rama.
Edi Rama shtoi se përveç titujve në media ka edhe një përpjekje të individëve të caktuar për të prodhuar alarme për virusin.
“Po shoqërohet edhe me infodemi (epidemi e lajmeve të konfimuara). Infodemia ka prekur mbarë botën sipas OBSH dhe në mënyrë të pashmangshme ka prekur edhe Shqipërinë. Në vendin tonë kjo situatë është shfaqur më shumë se në një formë. Tituj që mbajnë ‘Koronavirus’ dhe ‘viktimë’ në titull, por edhe përpjekja individuale e grupeve të caktuara për të nxitur panikun dhe për të prodhuar alarme”, tha Rama.
