Pas muajsh pritjeje dhe diskutimesh, UEFA ka zyrtarizuar vendimin për sfidën e ardhshme mes kombëtares së Serbisë dhe Shqipërisë. Ndeshja, e cila konsiderohet një nga më të nxehtat e Ballkanit, nuk do të luhet në kryeqytetin serb, por në qytetin e Leskovacit, më 11 tetor.
Takimi do të zhvillohet në “Gradski stadion Dubočica”, një stadium modern i vendosur pranë kufirit me Kosovën, dhe që ka kapacitetin për të pritur këtë përballje të veçantë. Vendimi i UEFA-s ka ardhur pas vlerësimit të rrezikshmërisë së lartë që mbart kjo sfidë, duke marrë parasysh tensionet e vazhdueshme dhe precedentët e mëparshëm mes dy kombëtareve.
Kjo lëvizje synon të garantojë sigurinë maksimale si për lojtarët, ashtu edhe për tifozët. Ndeshjet e së shkuarës, si ajo e vitit 2014 në Beograd, kanë kaluar përtej kufijve sportivë duke u shoqëruar me incidente të shumta dhe duke mbetur ende në kujtesën e opinionit publik.
Përballja e 11 tetorit pritet të ngjallë emocione të mëdha, jo vetëm për futbollin shqiptar dhe atë serb, por për gjithë rajonin. Sytë e futbollit europian do të jenë të drejtuar nga Leskovaci, në një mbrëmje që pritet të jetë më shumë se thjesht një ndeshje futbolli.
Kush nga ju mezi po e pret këtë ndeshje?
