E dini se kush është vendimi i parë i Këshillit Bashkiak të Gjirokastrës gjatë pandemisë? Meqenëse jemi në kohë pandemie, mendja na shkon se do të ishte ndonjë vendim për të ndihmuar të moshuarit apo për të rritur ndihmën ekonomike. Në fakt, i rriti rrogën kryetarit të Bashkisë, Flamur Golemit dhe stafit të tij.
Më 27 mars 2020, Këshilli Bashkiak i Gjirokastrës, ndryshoi papritur vendimin e buxhetit, për të bërë një rritje të fondit të pagave dhe të nivelit të pagave me 14 milionë lekë. Sigurisht, edhe kryetari që ka rrogën më të madhe duhet të ketë përfituar në mënyrë të konsiderueshme nga kjo rritje.
Do të ishte më mirë që buxheti i shtetit të anonte nga shtresat në nevojë gjatë pandemisë dhe jo për militantët e punësuar apo për kryebashkiakun. Çuditërisht, ky vendim është marrë në kohën kur Kryetari i Kuvendit, Gramoz Ruçi, mori iniciativën që gjithë zyrtarët e socialistë, përfshirë edhe në bashki të lënë gjysmën e rrogës për përballimin e pandemisë.
Një qese me ushqime në Lazarat
Nga konsultimi me të dhënat zyrtare, nuk rezulton që të ketë ndonjë vendim nga kjo bashki në favor të pensionistëve. E vetmja ndihmë për të moshuarit mbeten fotografitë e hedhura në Facebook nga kryetari Golemi për aksionin e shpërndarjes së qeseve me ushqime.
Ato ditë të gjithë zyrtarët e Rilindjes hodhën në rrjetet sociale foto dhurimesh te qeseve me ushqime familjeve në nevojë. Edhe Golemi më 25 mars 2020, shkruan në faqen e tij zyrtare:
“Pranë familjeve në nevojë të Lazaratit, për t’i ndihmuar sadopak në këtë situatë të pazakontë dhe për t’i këshilluar që nuk duhet të dalin nga shtëpia, sidomos të moshuarit. Kjo sakrificë është e pashmangshme në luftën që kemi nisur me Covid-19…”
Pasuria që u rrit me rrogat
Sipas të dhënave të gjeneruara nga skeda e pasurisë së plotësuar nga vetë ai pranë ILDKPI, Golemi zotëron dy makina. Makina e parë ka një vlerë prej 5,500 euro dhe rezulton në bashkëpronësi me bashkëshorten, ndërsa e dyta që është në pronësi të plotë të tij kap vlerën prej 33,350 eurosh.
Gjithashtu ai është edhe pronar i një shtëpie në Gjirokastër me vlerë 3.700.000 lekë. Golemi ka jo pak para të depozituara në llogari bankare. Burimet e këtyre të ardhurave janë të ndryshme duke filluar nga puna si mjek, si deputet e si kryetar i Partisë Socialiste të Gjirokastrës.
Në vitin 2018, këto të ardhura kanë qenë të larta nga aktivizimi si deputet. Edhe kur u bë kryetar i Bashkisë Gjirokastër, Golemi ka rritje nga kursimet e rrogave.
Paratë për makina dhe karburant
Kryebashkiaku nuk është nikoqir kur vjen puna tek paratë e shtetit, ashtu siç bën me rrogën e tij. Vetëm gjatë katër ditëve të para të muajt nëntor, bashkia e Gjirokastrës ka shpenzuar nga paratë e taksapaguesve gjirokastritë 2602630 lekë (të reja) për vaj, goma, karburant, bateri dhe pjesë këmbimi.
Duke e krahasuar me taksat e mbledhura, kjo është 1/4 e të ardhurave të pushtetit vendor që u përlanë brenda katër ditëve të nëntorit.
Reflektim
Kryetari i Bashkisë Gjirokastër, Flamur Golemi, më 28 tetor, është vetizoluar për shkak të COVID-19 dhe i ndjek punët nga shtëpia. Shpresojmë që gjatë izolimit kryebashkiaku të ketë kohë të reflektojë seriozisht për situatën e shtresave në nevojë në bashkinë e Gjirokastrës dhe të japë ndonjë ndihmë tani para festave të Nëntorit ose para Krishtlindjeve.
