Detaje të reja janë zbardhur nga ekzekutimi i 25-vjeçarit Klodian Rasha, nga efektivi i forcave Shqiponja Nevaldo Hajdaraj. Sipas Abc News në dosjen e prokurorisë thuhet se dy efektivet e kanë marrë shërbimin në orën 21:30 minuta të datës 7 dhjetor dhe kanë dalë për të kryer shërbimin në terren. Në dokumente thuhet se dy policët kanë qenë të pajisur më të gjithë mjetet e duhura, armë, antiplumb, por nuk kishin kamera trupi, e cila mund të ndihmonte në zbardhjen e plotë të dinamikës së ngjarjes. Sipas Prokurorisë, efektivët, kanë ndaluar një makinë në rrugën Dritan hoxha dhe kanë konstatuar një të ri që ishte i mbështetur tek muri.
Kolegu i Hajdarajt i ka thirrur që të ndalonte, por Rasha është larguar me vrap. Sipas regjistrit të sallës operative rezulton se dy efektivet në orën 01:09 ka njoftuar se janë në ndjekje të një të riu që nuk i është bindur urdhrit të për të ndaluar, vetëm 3 minuta me vonë thuhet në dosjen e organit të akuzës, është telefonuar salla operative dhe policët kanë kërkuar një autoambulancë dhe më pas në orën 01:14 minuta është lajmëruar se është qëlluar me armë në drejtim të personit që nuk ju bind urdhrit të policisë.
Dosja e prokurorisë është në kundërshtim me njoftimin zyrtarë të policisë së Tiranës që, thuhej se ngjarja ka ndodhur në orën 01:45 minuta të mëngjesit të datës 8 dhjetor. Gjithashtu në dosje është specifikuar se në drejtim të Klodian Rashës, janë qëlluar dy plumba njëri e ka prekur në shpatull dhe i ka prekur zemrën, ndërsa plumbi tjetër ka bërë rikoshet dhe e ka gërvishtur në kokë. Po ashtu në dosje thuhet se viktima Klodian Rasha kishte edhe disa plagë të tjera që akoma nuk janë specifikuar se nga se janë shkaktuar.
Hajdaraj thekson faktin që i riu e ka kërcënuar në momentin që ka nisur ta ndiqe duke i thënë se do e qëllonte me armë. Gjithashtu efektivi pretendon se e ka qëlluar në pjesët e poshtme të gjymtuarve, alibi që rrëzohet nga ekspertiza që ju bë trupit të viktimës. Prokuroria ka sekuestruar kamerat e sigurisë së 5 bizneseve në zonë, për të zbardhur të gjithë skemën dhe lëvizjet që ka kryer Klodian Rasha, para se të ekzekutohej nga polici. Ditën e premte Nevialdo Hajdaraj do të përballet me gjykatën e Tiranës për caktim të masës së sigurisë. Kurse prokuroria ka kërkuar arrest në burg.
Mbrëmjen e djeshme, kryeqyteti u përfshi në protestë masive ku qytetarë të shumtë u mblodhën para Ministrisë së Brendshme duke kërkuar dorëheqjen e ministrit Sandër Lleshaj.
Më pas ata u zhvendosën drejt Kryeministrisë, ku kanë tentuar të hyjnë brenda por nuk ia kanë dalë. Në orën 22:00 protestuesit marshuan drejt shtëpisë së Klodian Rashës, ku edhe ndezën qiri në kujtim të 25-vjeçarit.
Protesta ishte e dhunshme pasi u dëmtuan dhe dogjën disa objekte si edhe u lënduan 9 efektivë, 3 prej të cilëve u shtruan në spital në gjendje të rëndë, pasi kanë marrë dëmtime serioze në kokë dhe në trup.
Sakaq, protesta paqësore pati edhe në qytete të tjera, si Vlorë, Elbasan, Durrës, Gjirokastër, Berat.
Ngjarja e rëndë ndodhi dy ditë më parë në Laprakë, kur efektivi qëlloi dy herë me armën e shërbimit të riun, pasi nuk pranoi të ndalonte kur i bëri thirrje. Klodian Rasha u qëllua në shpinë sipas ekspertizës paraprake dhe ka ndërruar jetë në vendngjarje.
