Janë publikuar detaje të reja nga hetimet për vdekjen e 19-vjeçares Myrto në Kefaloni, ku në qendër të çështjes ndodhen tre të arrestuar, mes tyre një ish-peshëngritës 26-vjeçar. Sipas raportimeve të SKAI, i riu ka dhënë një version të zgjeruar të ngjarjes gjatë dëshmisë së tij, duke pretenduar se kishte blerë dy herë drogë për përdorim në natën fatale në hotel.
Ai ka deklaruar se fillimisht 19-vjeçarja ka shfaqur një krizë epileptike dhe se ai ka tentuar t’i mbajë gjuhën për të shmangur mbytjen, duke shtuar se në atë moment ajo dyshohet se i ka kafshuar gishtat. Për këtë arsye, ai ka kërkuar edhe kryerjen e një ekzaminimi mjeko-ligjor.
Sipas dëshmisë së tij, më pas ai ka njoftuar shokun e tij që ndodhej në dhomën ngjitur dhe së bashku kanë nxjerrë vajzën nga dhoma. Ai pretendon se e ka zbritur poshtë dhe e ka vendosur pranë një muri, duke e mbuluar me një pallto që, sipas tij, i përkiste 22-vjeçarit. Më tej, 26-vjeçari ka deklaruar se ai dhe 22-vjeçari e kanë dorëzuar të renë te shërbimet e urgjencës.
“Myrto ishte gjallë, ku ishin mjekët në spital?” ka deklaruar avokati i 23-vjeçarit, duke ngritur pretendime për neglizhencë mjekësore gjatë trajtimit të saj.
Ndërkohë, mbrojtja e të pandehurit 22-vjeçar ka hedhur poshtë përgjegjësinë direkte, duke theksuar se viktima ka mbërritur në spital ende e gjallë dhe duke kërkuar hetim mbi veprimet e stafit mjekësor atë natë. Avokati ka deklaruar gjithashtu se klienti i tij ndodhej në dhomë vetëm për të pastruar ambientin dhe se nuk ka pasur rol në ngjarjen kryesore.
Ai ka shtuar se i mbrojturi i tij nuk ka precedent penal dhe ka vënë në pikëpyetje bazën e akuzave, ndërsa ka kritikuar edhe rrjedhjen e materialeve hetimore në media, duke kërkuar ruajtjen e konfidencialitetit të procesit.
