Shqiptarët janë vendosur në qendër të polemikave të vazhdueshme politike të ditëve të fundit, rreth refugjatëve që hyjnë ilegalisht në Britaninë e Madhe.
Deklarata e Ministres së Brendshme, Suella Braverman, se me politikat e saj të reja do t’i japë fund asaj që ajo e quan “pushtim” të emigrantëve që mbërrijnë në brigjet britanike, bëri xhiron e rrjetit kudo, duke shkaktuar reagime të forta për “gjuhën e saj të ashpër”. Gjatë fjalës së saj Braverman i cilëson shqiptarët si “kriminelë” dhe ka qenë pikërisht kjo fjalia që nxiti shumë reagime si nga politikanë por edhe nga emigrantë shqiptarë në Britani.
Madje së fundmi po paralajmërohet edhe një protestë në qytetin e Londrës, e cila po mbështetet edhe nga personazhet publikë.
Këngëtarja Dafina Zeqiri dhe reperi Noizy (Rigels Rajku), kanë ndarë në rrjetet e tyre sociale një video të shkurtër të deklaratës së Braverman, shoqëruar me të dhënat e protestës, datën dhe orën.
Emigrantët shqiptarë që jetojnë në Britaninë e Madhe kanë akuzuar se po përdoren si justifikim për të mbuluar problemet me politikën e tyre të emigracionit në Britani dhe kritikuan Ministrinë e Brendshme se ata po ndikonin në sigurinë e vendit.
Ata janë shprehur se janë larguar nga Shqipëria për një jetë më të mirë në Britani, për të punuar aty dhe për të paguar taksa, ndërsa këmbëngulin se nuk janë “gangsterë apo hajdutë”.
Daily Mail u kushtoi një vëmendje të madhe shqiptarëve që punojnë në Angli. Jashtë një lokali në veri të Londrës, shqiptarët e intervistuar nga media prestigjoze janë shprehur se janë viktima të racizmit të hapur dhe ishin vënë në shënjestër me qëllim nga qeveria britanike për të larguar vëmendjen nga menaxhimi i dobët i situatës në kanalin e La Manshit.
Disa ditë më parë, Kryeministri Edi Rama kritikoi Sekretaren e Brendshme Suella Braverman për ‘nxitjen e ksenofobisë’ pasi ajo e kishte cilësuar mbërritjen e shqiptarëve në Britaninë e Madhe me varka të vogla si një ‘pushtim’.
