Fenomeni shqetësues i masakrimit të kafshëve të rrugës vazhdon të jetë prezent në vendin tonë. Një tjetër ngjarje e rëndë është denoncuar në rrjetet sociale, ku një qenushe është torturuar, masakruar dhe më pas është varur në pemë.
“Një krim makabër ka ndodhur së fundmi në vendin tonë ku një qenushe e pafajshme është torturuar, masakruar dhe është varur në pemë. Qenushja ishte nënë dhe në videon e publikuar nga “Animal Rescue Albania”, asaj i del ende qumësht nga gjinjtë, një pamje drithëruese. Ajo kishte sjellë në jetë këlyshë, por nuk mundi t’i mbronte e t’i shpëtonte nga kriminelët të cilët e ndëshkuan pa asnjë faj”, shkruhet në postimin e publikuar në “Facebook”.
Më pas, në postim bëhet thirrje për miratimin e Ligjit për Mbrojtjen e Kafshëve, në mënyrë që autorët të marrin dënimin e merituar për masakrimin e kafshëve të pambrojtura.
