Mëngjesin e ditës së sotme Tirana u trondit nga një krim makabër. 31-vjeçari Xhaferr Mata ekzekutoi me armë zjarri 19-vjeçaren Xhuljeta Çuni, dhe më pas qëlloi edhe veten e tij. Pak kohë pasi u dërgua në spital i humbi jetën.
“News24” ka zbuluar se i riu ka qenë i martuar dhe është divorcuar nga gruaja pasi kishte nisur lidhjen jashtëmartesore me 19-vjeçaren. Fqinjët e 31-vjeçarit kanë treguar se marrëdhënia mes Xhuljetës dhe Xhaferit ka ekzistuar që prej kohës që ai ka qenë i martuar. Sipas tyre ai është divorcuar me bashkëshorten, me te cilën ka edhe një djalë 1 vjeç, për të vazhduar lidhjen me 19-vjeçaren.
Burime për “OraNews” kanë thënë se Xhuljeta dhe Xhaferri njiheshin prej gati 2-3 vitesh. Ndërsa gazetarja e “News24” ka treguar se ata ishin të lidhur prej 6 muajsh, por lidhja e tyre nuk kishte funksionuar dhe 19-vjeçarja kishte kërkuar ndarjen. I riu nuk e ka pranuar këtë situatë dhe mëngjesin e sotëm ka kryer edhe krimin makabër.
Fqinjët e Xhuljetës kanë treguar për “News 24” se ajo punonte në një market pranë zonës ku ndodhi ngjarja, ku dhe është njohur me të riun nga Kukësi.
Ndërkohë mësohet se djalin 1-vjeçar e kishte në kujdestari Xhaferri dhe mëngjesin e sotëm ai u kishte kërkuar fqinjëve të tij që t’ia mbanin për disa orë pasi i duhej të largohej se kishte një punë.
