Pavarësisht shtimit të rasteve të reja me Covid-19 dhe paralajmërimit të kryeministrit Rama për kthimin e karantinës, kreu i Urgjencës Kombëtare Skënder Brataj tha sonte se kjo gjë nuk mendohet për momentin.
Në një intervistë për “Opinion”, Brataj u shpreh se vendi do të shkojë sërish në karantinë nëse numri i pacientëve që kërkojnë hospitalizim i kalon kapacitetet e spitalit, pra shkon më shumë se 400 të shtruar, duke qenë se numri total i shtretërve është 400.
“Për momentin as që e mendojmë të mbyllemi prapë në karantinë. Ne mund të mbyllemi vetëm nëse numri i kapaciteteve në spitale arrin aq shumë saqë i saturon të gjitha resurset tona, si në burime njerëzore pra në mjekë e infermierë, si në shtretër, do ndodhë si në të gjithë botën.”, deklaroi ai.
Aktualisht nga 400 shtretër, 55 janë të zënë, teksa numri një i Urgjencës tha se nuk mendon se do izolohemi sërish.
“Tani kemi dhe një gjë pozitive pasi koha e shërimit është më e shkurtër se më parë“, tha Brataj.
Kujtojmë se mbrëmjen e sotme dy pacientë kanë ndërruar jetën te Infektivi, duke e çuar numrin total të të vdekurve në 41.
Ndërkohë, nga fillimi i epidemisë e deri tani janë infektuar 1 788 persona.
