Xhudistja nga Kosova, Distria Krasniqi, shënoi arritjen më të madhe të karrierës duke fituar medaljen e arit në lojarët olimpike “Tokio 2020”. Krasniqi e ka nisur mbarë ditën e parë të “Tokio 2020”, pasi ka fituar të gjitha ndeshjet, ku në finale ajo u përball me japonezen Funa Tonaki. Loja ishte e vështirë, por shqiptarja ia doli të triumfojë dhe t’i tregojë të gjithëve aftësitë e saj në xhudo.
Pas triumfit, ajo ka folur për herë të parë për “Gazeta Expres”, ku ka rrëfyer emocionet e fitores së madhe.
Ajo deklaroi se koleksionit të medaljeve i mungonte vetëm medalja olimpike dhe se është krenare që ka hyrë në historinë e Kosovës.
“Koleksionit të medaljeve të mia i ka munguar vetëm medalja olimpike dhe jam shumë e lumtur që sot e mora medaljen e më e lumtur që ajo medalje është e artë. Jam shumë krenare që jam bërë pjesë e historisë së Kosovës pas shumë mundi e sakrifice”, është shprehur kampionia olimpike.
Ajo tha se ndërrimi i kategorisë nga 52 kilogramë deri 48 kilogramë rezultoi vendim me vend.
“Po ndërrimi i kategorisë ishte vendim me vend edhe jam shumë e lumtur që e kemi marrë këtë vendim me trajnerin tim” , tha Distria.
E pyetur nëse mund të presim për medalje të tjetra nëlojërat olimpike ajo është shprehur: “Shpresoj që po, unë do vazhdoj të punoj njësoj si deri tash për Lojërat Olimpike Paris 2024”.
