Përgjatë fundjavës, përdoruesja e “Facebook”-ut, Katelyn Marie Todd, postoi një foto në mediat sociale të vetes duke krehur flokët. Duket si diçka e zakonshme, por për dikë që lufton me depresionin, Todd ka një mesazh për të ndarë duke zbuluar se këto veprimet e vogla, janë diçka e vështirë për ata që vuajnë nga sëmundjet mendore.
Prej kohësh nuk kujdesej për veten; nuk lahej; nuk krihej; nuk pastronte; vetëm flinte dhe qante. Për herë të parë ajo krehu flokët pas katër javësh dhe u la.
Vajza e quajtur Katelyn thotë se po përpiqet ta kalojë të gjithë këtë, por mundohet t’u shpjegojë të tjerëve ç’do të thotë të jesh në depresion dhe përse është kaq e vështirë.
Rrëfimi i saj prekës zbulon si pak herë jetën e njerëzve që vuajnë depresion, ditët e errëta pa shpresë, mbushur me dëshpërim. Është shpërndarë më shumë se 272 mijë herë në “Facebook”, ndërsa shumë njerëz tregojnë në komente se e kanë përjetuar edhe vetë më parë dhe bëhen njësh me dhembjen e Katelyn-it.
“Sot kreha flokët. Për herë të parë pas 4 javësh. Ishin ngjitur dhe ngatërruar. Këputeshin dhe binin pas çdo furçe. Teksa i laja dhe i zbusja me krem, qaja, sepse e kisha harruar si është t’i ndjesh flokët mes gishtërinjve. Gjithashtu lava dhëmbët, për herë të parë pas një jave. Mishrat m’u gjakosën. Rridhte ujë i kuq. Qava edhe për këtë, gjithashtu. Kur dola nga dushi nuk ndaloja dot së marri erë krahëve dhe flokëve. Prej ca kohe i kam shmangur përqafimet, sepse asnjëherë nuk mbaj aromë të mirë. Gjithmonë kundërmoj si të kem qenë për një javë regjim shtrati. Nuk kam rroba të lara, sepse ndihem tepër e lodhur dhe e trishtuar për t’i larë.
Depresioni nuk është i bukur. Depresion do të thotë higjienë e keqe, pjata të palara dhe trup me erë tharmi nga të fjeturit e tepërt. Depresion do të thotë të kesh vetëm 3 shokë që të takojnë ndonjëherë vetëm sepse kanë durimin dhe dashurinë e një shenjtori. Depresion do të thotë të qash derisa s’mbeten më lot, pasi ke dënesur duke gulçuar derisa të merret fryma. Depresion do të thotë të shikosh tavanin derisa të djegin sytë, sepse harron t’i pulitësh. Depresion do të thotë t’i bësh familjarët të qajnë, sepse mendojnë se ti nuk i do më, sepse ti je e largët dhe e hutuar. Depresioni është mendor po aq sa emocional, një zbrazëtirë që e ndien fizikisht.
Ju lutem, tregohuni të butë me miqtë dhe familjarët që nuk kanë energji të ngrihen e të lahen, të pastrojnë, të dalin, të kujdesen për veten. Dhe ju lutem, ju lutem merreni seriozisht nëse ju flasin lidhur me këtë. Do të thotë se po përpiqen. E shikon? Unë sot kreha flokët”.
Burimi: Glamour
