Testimi për Covid-19 është padyshim tema më e nxehtë e muajve të fundit pas goditjes së vendit tonë nga pandemia, veçanërisht në një moment kur situata duket se po del jashtë kontrollit me rastet e reja dhe viktimave gjithnjë në rritje.
Më 19 korrik Ministria e Shëndetësisë njoftoi se testimet serologjike do të bëhen në laboratore private, në funksion të rritjes së kapaciteteve për përballimin e situatës me pandeminë! Komiteti Teknik i Ekspertëve, ka miratuar Protokollin për fillimin e testimeve serologjike në strukturat jopublike, që duhet të jenë të validuara paraprakisht nga Instituti i Shëndetit Publik.
Menjëherë na lindi pyetja nëse do të paguajmë për testet serologjike dhe sa? Kjo pyetje së fundmi ka marrë përgjigje dhe çmimi s’mund të ishte më i kripur.
Disa laboratore private kanë nisur informimin e qytetarëve se do të nisin testet serologjike që do kushtojnë 4000 lekë të reja.(40 mijë lekë të vjetra)
Mirëpo, legjislacioni shqiptar parashikon se në rast epidemie, diagnoza dhe kura për të sëmurët duhet të ofrohet pa diskriminim dhe falas, si nga institucionet publike, ashtu dhe nga ato private.
“Neni 4 i ligjit ‘Për parandalimin e sëmundjeve e epidemike” ndalon diskriminimin midis pacientëve, ndërsa në pikën ‘ç’ për të mos lënë hapësirë abuzimi, sanksionon se ‘parandalimi dhe luftimi i sëmundjeve infektive me karakter epidemik…, ofrohet falas për çdo person’. Ligji e përsërit këtë detyrim edhe dy herë të tjera.
‘Çdo person i sëmurë nga sëmundjet infektive me karakter epidemik ka të drejtën dhe detyrimin të mjekohet falas në çdo institucion shëndetësor publik apo jopublik,’ thuhet më tej në ligj.
Po ashtu në nenin që përcakton financimin, bëhet e qartë se ndërsa barra ishte mbi buxhetin e shtetit, edhe ‘institucionet jopublike marrin masa që, me financat e tyre, të përmbushin detyrimet që rrjedhin nga zbatimi i këtij ligji dhe akteve nënligjore në zbatim të tij.’”
Po ashtu, këto teste dhe çdo test tjetër për Covid-19 duhet të kryhet vetëm nga Instituti i Shëndetit Publik, që ka ekskluzivitetin në Shqipëri për të kryer këtë lloj analize pasi duhet certifikimi nga Organizata Botërore e Shëndetësisë. Në një kohë kur këto laboratore nuk janë certifikuar nga OBSH, si mund tu besojmë atyre këtë lloj analize?
Këtu u bazua edhe hetimi i ngritur në mars nga Prokuroria e Tiranës për Spitalin Amerikan, i cili sipas burimeve për iconstyle.al asokohe, jo vetëm që kishte nisur testimet në një kohë që ishte i pacertifikuar nga ISHP, por i ofronte ato në çmimet abuzive 300-400 euro.
E në këto kushte kur shtabi i punës anti-Covid-19 nuk po vepron në përputhje me ligjin, Prokuroria duhet të marrë masa urgjente ndaj korrupsionit që po u bëhet shqiptarëve këto ditë të vështira, kur janë më të rrënuar ekonomikisht se kurrë.
Pak kohë më parë, iconstyle.al vuri në dukje se edhe pse në periudhë pandemie, janë lënë tërësisht në hije laboratorët që janë pjesë e koncesionit të check-up-it, koncesion 10-vjeçar me një vlerë prej 120 milionë eurosh që e paguajnë pikërisht taksapaguesit shqiptarë.
Kështu shqiptarët do të detyrohen të paguajnë dyfish, nëse duan të bëjnë këto analiza serologjike, njëherë privatit dhe njëherë për koncensionin që e paguajmë pikërisht me taksat tona.
Kontrata e koncesionit të check-up-it, parashikon një numër prej 475 mijë kontrollesh bazë në vit, të cilat asnjë vit nuk janë kryer të plota, e megjithatë paguhen nga shteti shqiptar si të ishin kryer të gjitha.
Vetëm për këto kontrolle të pakryera, taksapaguesit shqiptarë i kanë paguar kompanisë “3P Life Logistic” të Vilma Nushit plot 6.5 milionë euro në harkun kohor të 4 viteve, sipas një raporti të KLSH-së, pagesë që është marrë për shërbime të pakryera, vetëm sepse kontrata e koncesionarit është përpiluar në mënyrë të tillë për të mbrojtur subjektin privat.
Për arsye që nuk të çojnë askund tjetër përveçse tek përfitimi, autoritetet shqiptare nuk po bëjnë asnjë hap për të siguruar shqiptarët dhe shëndetin e tyre në këtë krizë shëndetësore dhe ekonomike.
