Një ekspozitë me piktura të vendosura në oborrin e presidencës së Kosovës synon të nxjerrë në pah dhimbjet dhe stigmën me të cilën përballen gratë dhe burrat e Kosovës, që ishin viktima të përdhunimeve gjatë luftës së vitit 1998-1999.
Ekspozita u hap në nderim të 14 prillit – Ditës së të Mbijetuarave të Dhunës Seksuale gjatë luftës së fundit në Kosovë – e shpallur nga presidentja Vjosa Osmani.
Në fjalën e saj, presidentja Osmani tha se drejtësia për viktimat e dhunës seksuale të luftës do të jetë e qëndrueshme vetëm atëherë kur kriminelët që kryen këto krime do të ballafaqohen me drejtësi.
View this post on Instagram
Ajo tha se sot 23 vite pas luftës së Kosovës kur kishte shpresë që bota nuk do të zgjohej më me dhimbje në sy të vajzave dhe grave por jo vetëm, dhimbja dhe trishtimi kanë zënë sërish vend në kontinentin evropian.
“Sot disa prej jush por edhe shumë gra të tjera në Kosovë bashkëndjejnë dhe e kuptojnë më së miri dhimbjen, trishtimin e zhgënjimin që janë duke përjetuar vajzat dhe gratë në Ukrainë por edhe në vendet e tjera të botës. Por, historia ka dëshmuar se e mira dhe e drejta triumfojnë gjithnjë. Historia ka dëshmuar se sa herë që kanë tentuar që të na poshtërojnë e të humbin dinjitetin tonë, gjithnjë jemi kthyer edhe më të fortë dhe më të zëshëm”, tha Osmani.
Viktima e dhunës seksuale gjatë luftës në Kosovë, Shyhrete Tahiri u bëri thirrje institucioneve të Kosovës që të angazhohen maksimalisht në plotësimin e kërkesave të kësaj kategorie.
Ajo bëri thirrje që 14 prilli të njihet zyrtarisht si ditë zyrtare memoriale për viktimat e dhunës seksuale të luftës.
“U bëj thirrje të gjithë të mbijetuarve të dhunës seksuale të luftës në Kosovë që të shfrytëzojnë të drejtat e garantuara me ligj dhe të mbështetura nga katër organizatat e autorizuara, të aplikojnë për njohjen e statusit si dhe të angazhohen edhe më shumë për qasje në drejtësi”, tha Tahiri-Sylejmani.
