Ditën e sotme, në Kosovë u konfirmuan dy raste të reja pozitive me Covid-19, duke e çuar në 35 numrin e të infektuarve. (Lexo këtu)
Mirëpo, numri i tyre është dyfishuar papritur, sipas një njoftimi nga Instituti Kombëtar i Shëndetësisë Publike.
Sipas njoftimit zyrtar, janë konfirmuar 26 raste të reja në vend, duke e çuar në 61 numrin e personave të prekur nga koronavirusi.
Të gjithë personat e prekur rezultuan të kishin pasur kontakte me persona të infektuar.
Njoftimi i plotë:
“Sonte me 23.03.2020 në Laboratorin e Mikrobiologjisë Molekulare në IKSHPK me metodën RT-PCR, janë testuar njëqind (100) mostra të marra në hulumtim të personave që kanë qenë në kontakt të afërt me rastet e konfirmuara dhe të gjithë kanë qenë në vetë izolim, përveç një rasti nga fshati Panorc, Malishevë, i shtrirë në Klinikën Infektive. Testimi në numër kaq i madh është bërë me qëllim të gjurmimit të të gjitha kontakteve të rasteve të konfirmuara të cilat janë gjetur në mënyrë proaktive nga ekipet e IKShPK. Nga këto mostra të marra për testim në virusin SARS-CoV, njëzet e gjashtë (26) prej tyre kanë rezultuar pozitive. Nga 26 rastet e konfirmuara të gjitha janë kontakte të gjurmuara të rasteve pozitive (familjarë dhe kontakte të ngushta), të detektuara përmes hulumtimit aktiv epidemiologjik. Prej tyre 14 raste janë nga komuna e Malishevës, 11 raste nga Gjilani dhe 1 rast nga Gjakova”, ka theksuar më tej Instituti.
Deri më tani, nga data 08.02.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 690 mostra të dyshimta në virusin SARS-CoV-2 dhe prej tyre, gjithsej gjashtëdhjetë e një (61) raste kanë rezultuar pozitive, me një (1) rast të vdekjes i një të moshuari 82 vjeç.”
Gjithashtu, në Kosovë është shënuar edhe viktima e parë nga Covid-19.
Viktima ishte 82 vjeç, i lindur në Dumnicë të Podujevës dhe vuante nga sëmundje kronike të zemrës dhe mushkërive.
Ai ishte infektuar nga djali dhe vajza e tij të cilët gjithashtu janë pozitivë.
