Këngëtarja me origjinë shqiptare, Rita Ora ka uruar Kosovën për 15-vjetorin e Pavarësisë. Ajo ka ndarë në rrjetin social ‘Instagram’ videomesazhin ku uron për këtë ditë të veçantë.
‘Gëzuar ditën e Pavarësisë Kosovë. Gjithmonë do jesh e përfaqësuar.’– shkruhet përkrah fotos.
Ndërsa videomesazhi i bërë për publikun është i veçantë pasi nis me këngën që Rita ka bërë në Kosovë. ‘Rita po vjen, Rita po vjen’-nis video-mesazhi. Këngëtarja shqiptare shprehet falënderuese për gjithë këto vite mbështetje që ka marrë nga Kosova dhe qytetarët e saj duke shtuar se fjalët për vendlindjen e saj nuk kanë fund.
“Do të mund të flisja pa u ndalur për rrugëtimin tim me njerëzit e mi në Kosovë. Urime Pavarësia Kosovë dhe faleminderit për të gjitha këto vite krenarie dhe mbështetjeje”, dëgjohet të thotë Rita në video.
Pritet që mesazhet e urimit të vijnë edhe nga Dua Lipa, Bebe Rexha dhe Ava Max, vajzat tona shqiptare që na përfaqësojnë më së miri në botë.
Sot Kosova feston 15 vjetorin e shpalljes së Pavarësisë. Më 17 shkurt të vitit 2008, Kuvendi i Kosovës shpalli njëzëri Kosovën shtet të pavarur sovran dhe demokratik. Shpallja e Pavarësisë së Kosovës ishte kurorëzim i një rrugëtimi të gjatë e të vështirë për qytetarët e Kosovës.
