Nëntë vite kanë kaluar që kur Kosova u shpall shtet më 17 shkurt të 2008-s. Ajo feston sot njëkohësisht shpalljen e pavarësisë dhe formimit të shtetit të ri.
Ceremonitë zyrtare që nisën para tre ditësh, kulmojnë sot me homazhe në varret e komandantit legjendar të UÇK-së, Adem Jashari dhe presidentit historik, Ibrahim Rugova.
Të dy këto, personalitete me kontributin më të madh në rrugën e Kosovës drejt të qenit shtet, do të nderohen nga krerët më të lartë të institucioneve kosovare. Por në axhendën tri ditore mungon parakalimi tradicional i Forcës së Sigurisë së Kosovës.
Në prag të Ditës së Pavarësisë, qeveria e Kosovës publikoi sloganin e këtij përvjetori të shtetit.
Ndërsa obelisku i pavarësisë “NEWBORN” ndryshoi edhe sot imazh si çdo vit. Ideatori i tij, Fisnik Ismaili, publikoi “fytyrën” e re që i ka dhënë për të përcjell një mesazh të veçantë, për një botë pa mure: “NEWBORN 9 – NO WALLS”.
Seanca solemne e kuvendit u zhvillua dje, po ashtu edhe pritja shtetërore me pjesëmarrjen edhe të kryeministrit të Shqipërisë Edi Rama. Hashim Thaçi, në fjalën e tij tha se Kosovën e kanë njohur 113 shtete.
Ndërsa kryeministri i Kosovës, Isa Mustafa, uroi për 9-vjetorin e Pavarësisë së Kosovës përmes një video të veçantë me titull “Kosova ime”.
“Kjo video në mënyrë simbolike përshkruan gëzimin dhe optimizmin për rrugën e pavarësisë. Urime 9 Vjetori i Pavarësisë së Kosovës!”, shkroi Mustafa.
