Protesta masive që u mbajt në Prishtinë në mbrojtje të të drejtave të femrave pas përdhunimin të 16-vjeçares nga profesori dhe më pas nga efektivi i policisë është mbështetur gjerësisht nga personazhe të njohur të ekranit.
Njëra prej tyre është edhe gazetarja Rudina Xhunga e cila sjell në vëmendje reagimet e pashembullta në Shqipëri ndaj 13-vjeçares në Kavajë që u përdhunua nga 7 minorenë.
Ajo shprehet se në Kosovë u ngritën të gjithë dhe e morën në mbrojtje viktimën e abuzimit seksual, ndërsa këtu gratë e Kavajës u çuan të përzenin minorenen që u përdhunua.
“Shikoni si reagon Prishtina. Të gjithë me parulla në duar, kanë dalë në rrugë për t’i thënë jo përdhunimit, pasi një e mitur u abuzua nga profesori i saj dhe polici ku shkoi ta denoncojë. Prishtina e mori në mbrojtje vajzën, as e gjykoi, as donte ta përzinte nga vendi, siç donin gratë e Kavajës, të përzënë vajzën e vogël që e përdhunuan ca përbindësha, të mitur edhe ata. Në Kosovë, nuk plasi debati Thaci- Haradinaj, kush e fshehu ngjarjen, as iu sul kush medias, pse merreni me dramën e vajzës. Ne jemi frikshmërisht larg Evropës që kërkuam. E meqë s’po dimë të afrohemi, le të themi:
E duam Shqipërinë si Kosova!”
