Një prej kanaleve më të mëdha të korrupsionit në vend, Tregu i Teknologjisë së Informacionit, po pëson ndryshime të rëndësishme. Ermal Beqiri, një nga përfituesit më të mëdhenj të tenderëve të IT-së nga AKSHI përmes kompanisë së tij Soft & Solution, sipas “Kapitalit” ka mbyllur marrëveshjen për blerjen e kompanisë Horizon, një shoqëri me pronësi në Qipro, e cila është përfituese e disa kontratave publike në Teknologjinë e Informacionit.
Transaksioni nuk është njoftuar ende në Qendrën Kombëtare të Biznesit, serveri i të cilit mirëmbahet pikërisht nga Soft & Solution, ndërkohë që shifra e blerjes nuk bëhet ende e ditur.
Mirëpo për t’ju kthyer pak pas në kohë, ishte pikërisht Horizon kompania që ndihmoi Ervin Muçën, drejtorin e IT në Polici, të futej në serverat e TIMS dhe të vidhte të dhënat e shqiptarëve.
Ervin Muça urdhëroi verbalisht punonjësit e databazës dhe serverave të kryenin eksportim të bazës së të dhënave të TIMS.
Sipas denoncimit të ekspertit të IT Gent Progni, Muça sapo erdhi, urdhëroi verbalisht punonjësit e databazës dhe serverave të kryejnë eksportim të bazës së të dhënave të TIMS, në një hard-disk të jashtëm, përfshirë këtu hyrje-daljet e personave, dokumentet biometrike, gjeneralitetet, ngjarjet kriminale dhe jo kriminale, aksionet e policisë, dosjet hetimore, lista terroristësh, gjobat e makinave, informacion territorial sekret, etj.
Refuzimit të punonjësve, Muça, në stil tipik mafioz, i gjeti zgjidhjen duke marrë një kompani nga jashtë të quajtur Soft Solution dhe bëri eksportimin ilegal të të dhënave.
Grabitësit e TIMS, me “porosi nga lart”, janë paraqitur si punonjës IT të QKB dhe të një kompanie tjetër të quajtur Horizon, me lidhje të dyshimta në Qipro, një parajsë fiskale. Një vit më vonë ka ardhur urdhër-arresti. Muça është i njëjti që vodhi edhe sistemin e pagave nga Drejtoria e Tatimeve kur punonte aty dhe i bëri publike.
Bashkëpunëtor me Muçën duket se po bëhet edhe Ermal Beqiri, të cilin e përmendëm më lart për blerjen e Horizon, që hyri në TIMS bashkë me ‘kolegët’.
Ermal Beqiri është një nga përfituesit më të mëdhenj të parasë publike në tregun e teknologjisë së informacionit përmes kompanisë së tij Soft & Solution. Me blerjen e Horizon, grupi i tij shndërrohet në një aktorët kyç të këtij tregu, të cilët diktojnë lëvizjen e parave të shtetit.
Emri i Beqirit u bë i njohur për herë të parë si një nga ekspertët e pajtuar për të vërtetuar autenticitetin e video përgjimit të Ilir Metës me Dritan Priftin. Më vonë kompania e tij u përfshi në skandalin e tenderëve të byzylykëve për të dënuarit, ndërsa pas monopolizimit të tenderëve të IT-së nga AKSHI, Beqiri u shndërrua në një nga ‘gjakpirësit’ e kontratave publike të këtij sektori.
Vetëm pak më ditë më parë Soft & Solution përfitoi një kontratë tjetër të majme mbi 5.6 milionë euro nga AKSHI për sistemin e qendërzuar të nënshkrimit elektronik.
Monopolizimi i të gjithë tenderëve të këtij tregu vetëm tek AKSHI, përveçse ka çuar në krijimin e një sektori vasal të qeverisë, ka krijuar një industri ku bizneset e suksesshme i cakton AKSHI dhe jo tregu.
Por pavarësisht nivelit të lartë të korrupsionit, i cili në sytë e qytetarëve është shpërfaqur me daljen e të dhënave sensitive në pazar apo skandale të paimagjinueshme si vjedhja e të dhënave të TIMS-it, deri tani SPAK nuk ka vepruar. Por përtej SPAK edhe opozita ka qenë e butë në denoncimet e korrupsionit në sektorin e IT-së dhe një nga arsyet besohet se janë lidhjet okulte të krijuara pikërisht nga kompanitë që përfitojnë tenderët e majmë të AKSHI-t, përfshirë Soft & Solution.
