Është shtuar me 21 numri i rasteve pozitive me koronavirus në Shqipëri në 24 orët e fundit.
Ministria e Shëndetësisë njoftoi dje se ka shkuar në 539 numri i të infektuarve në total, nga 5080 raste të dyshuara dhe testuara. Ndërkohë në spitalin e Infektivit janë 35 të shtruar, 7 pacientë prej të cilëve janë në terapi intensive. Nga rastet e reja, 11 i përkasin Shkodrës, 4 Tiranës, 4 Krujës dhe hartës i shtohet Kurbini me 2 raste.
Gjatë 24 orëve të fundit, 6 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 283. Deri sot, 26 qytetarë e kanë humbur betejën me këtë sëmundje, megjithë përpjekjet e stafit mjekësor.
480 të infektuar me koronavirus në Kosovë
Janë konfirmuar edhe 31 raste të reja me COVID-19, duke çuar në 480 numri i të infektuarve në Kosovë. Po ashtu sot janë shëruar pesë persona nga virusi në 24 orët e fundit.
Dje nga Klinika Infektive është raportuar edhe një rast i vdekjes së një pacienti, 70 vjeç nga Neredime e epërme -Ferizaj, i konfirmuar me COVID-19 me datë 13.04.2020. Pacienti është referuar nga QMF-Ferizaj dhe hospitalizuar në Klinikën Infektive me 12.04.2020 në gjendje të rënduar. Ai ka pasur sëmundje shoqëruese (Inflitrim pulmonar dhe Hipertension arterial).
49 viktima në Maqedoni
Numri i personave që e kanë humbur jetën si pasojë e virusit në Maqedoni është 49. Sipas statistikave zyrtare në Maqedoni gjithsej 1117 janë infektuar me koronavirus. Ministria e Shëndetësisë në Maqedoninë e Veriut informon se gjatë ditës së djeshme 18 pacientë janë shëruar nga Covid-19.
Bëhet fjalë për 11 pacientë që janë lëshuar nga Klinika Infektive në Shkup, 2 nga spitali i Dibrës, ndërsa 5 tjerët (2 në Koçan dhe 3 në Shkup) janë shëruar në kushte shtëpiake.
Numri i përgjithshëm i atyre që e kanë mposhtur Covid-19 shkon në 139.
Mbi 2,2 mln të infektuar në mbarë botën
Numri i personave të infektuar me koronavirus në botë ka tejkaluar shifrën 2.2 milion përkatësisht 2.251.768.
Sipas të dhënave të Universitetit Johns Hopkins, 154,295 persona kanë vdekur në gjithë botën dhe 574,383 janë shëruar.
Shtetet e Bashkuara kanë numrin më të madh të të prekurve, (710,272 persona), të pasuara nga Spanja (190,839 persona), Italia (172,434 persona) dhe Franca (147,969 persona).
SHBA deri më tani ka numrin më të madh të viktimave, 37,175, duke tejkaluar Italinë ku numërohen 22,745 persona të vdekur, dhe pas Italisë vendi tjetër më i prekur është Spanja me 20,002 viktima.
Një tjetër vend i Evropës, Franca numëron 147,969 të infektuar dhe 18,681 viktima. Franca ka raportuar 761 vdekje të reja nga koronavirusi, në 24 orë.
Jerome Salomon, kreu i autoritetit të shëndetit publik, tha se numri i pacientëve në kujdes intensiv ishte në rënie për të nëntën ditë radhazi në 6,027.
Mbretëria e Bashkuar deri më tani ka më shumë se 14,570 të vdekur dhe mbi 108,690 të infektuar.
Janë 3,609 raste të reja të koronavirusit të regjistruar në Gjermani në 24 orët e fundit për një total prej 137 439. Në 24 orët e fundit numri i vdekjeve u rrit me 242 viktima të tjera duke e çuar totalin e viktimave në 4110.
Rastet e koronavirusit në Turqi janë rritur me 4,353 në 78,546 në 24 orët e fundit, tha Ministri i Shëndetësisë Fahrettin Koca.
Vdekjet arritën në 1.769 ndërsa gjithsej 8.631 njerëz janë rikuperuar.
/Iconstyle.al
