10 pacientë me koronavirus janë shëruar vetëm dje në vendin tonë duke e çuar numrin total të të shëruarve në 99.
Ndërkohë, dje është shënuar viktima e 17-të në Shqipëri nga COVID-19. Në spitalin Infektiv ka ndërruar jetë një pacient 75-vjeçar. Pacienti ka mbërritur në spital në gjendje të rëndë, teksa vuante nga post-hemorragjia cerebrale, diabeti dhe hipertensioni.
Deri më tani, numri i të infektuarve ka shkuar 304.
135 të infektuar me koronavirus në Kosovë
Instituti Kombëtar i Shëndetësisë Publike të Kosovës, përmes një njoftimi të publikuar pas mesnate, ka bërë të ditur se në Laboratorin e Mikrobiologjisë Molekulare në IKSHPK, janë testuar 138 mostra të marra nga rastet e hospitalizuara në Klinikën Infektive dhe nga gjurmimi i kontakteve të rasteve në terren.
Sipas IKSHPK-së, nga mostrat e marra për testim në virusin SARS-CoV-2, tre prej tyre kanë rezultuar pozitive, duke e çuar numrin total të të infektuarve në 135.
“Nga data 08.02.2020 deri më 04.04.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 1.743 mostra të dyshimta në virusin SARS-CoV-2 dhe prej tyre, pozitive rezultojnë gjithsej 135 raste”, thuhet në njoftim.
13 viktima në Maqedoninë e Veriut
Ka shkuar në 13 numri i viktimave nga Covid-19 në Maqedoninë e Veriut, ndërsa dy pacientë kanë humbur jetën brenda një dite.
Bëhet fjalë për një 68-vjeçar nga rrethina e Tetovës, që vuante edhe nga hipertensioni arterial. Viktima e dytë është 70-vjeçar nga Kumanova që vuante nga hipertensioni dhe sëmundje të zemrës, por nga dikasteri i Shëndetësisë thonë se rezultatet e testimit të tij për COVID-19 janë në pritje.
Gjithashtu janë shënuar dhe 46 raste të reja me koronavirus duke e çuar në 430 numrin total të të infektuarve.
2786 pozitivë brenda një dite në Turqi
Numri i përgjithshëm i rasteve të konfirmuara me COVID-19 u rrit në 20.921, pasi 2.786 persona kanë rezultuar pozitivë në testet për virusin brenda një dite, njoftoi ministri i Shëndetësisë Fahrettin Koca në një konferencë për shtyp.
Deri më tani, gjithsej 484 pacientë janë shëruar dhe janë liruar nga spitalet, ndërsa 1.251 pacientë aktualisht po trajtohen në njësitë e kujdesit intensiv, shtoi Koca.
69 viktima të reja nga pandemia ka pasur gjatë 24 orëve të kaluara, ndërsa numri i përgjithshëm i të vdekurve në vend ka shkuar në 425.
Rastet e koronavirusit tejkalojnë shifrën 1.1 milion në nivel global
Numri i infeksioneve të konfirmuara me koronavirus ka kaluar shifrën 1.1 milionë, sipas të dhënave të përpiluara nga Universiteti Johns Hopkins.
Të paktën 181 vende dhe territore në SHBA. janë prekur nga virusi, i cili ka vrarë mbi 58.900 njerëz. Mbi 226.600 njerëz janë shëruar.
40 mijë vdekje në Evropë
Numri i vdekjeve në Evropë është rritur në rreth 40,000, ndërsa në Shtetet e Bashkuara numri i vdekjeve arriti më shumë se 7,000, duke e çuar numrin e vdekjeve në të gjithë botën në më shumë se 58,000, sipas të dhënave të përpiluara nga Universiteti Johns Hopkins.
Numri i rasteve vazhdon të rritet, me SHBA-të që raportojnë më shumë 275,000 infeksione, ndërsa Italia, Spanja dhe Gjermania kanë regjistruar më shumë se 300,000 raste.
Në të gjithë botën, numri i të infektuarve ka kaluar shifrën 1.1 milionë, ndërsa numri i të shëruarve afër 226,000.
Vetëm 19 raste të reja në Kinë
Sipas të dhënave zyrtare të bëra publike gjatë 24 orëve të fundit në Kinë janë shënuar vetëm 19 të infektuar të rinj, ndryshe nga vendet e Europës dhe SHBA që po shënojnë me mijëra të prekur dhe viktima.
Ndërkohë gjatë 24 orëve të fundit në Kinë ka patur 4 vdekje duke e çuar numrin total në 3,326 viktima. Në total në Kinë janë prekur 81.639 por 76.755 prej tyre jenë shëruar, duke e lënë numrin aktiv që janë të prekur aktualisht nga koronavirusi në 1.558.
/Iconstyle.al
