Ka shkuar në 42 numri i të prekurve nga Koronavirusi në Shqipëri, ku vetëm brenda 24 orëve të fundit janë shënuar 4 raste të reja.
“Gjatë 24 orëve të fundit ka vazhduar puna në terren pa u ndaluar. Janë testuar 27 persona të dyshuar qytetarë dhe personale. 4 raste të reja janë konfirmuar. Janë testuar në total 532 raste dhe janë pozitiv vetëm 42 raste”, bëri me dije dje zëvendësministrja, Rakacolli.
Mes të prekurve dy prej të tyre janë mjekë të spitalit “Shefqet Ndroqi”. Dy mjekët e Sanatoriumit kanë pasur kontakt me një nga të infektuarit dhe për pasojë janë infektuar me COVID-19.
Kështu, deri tani kemi:
Tiranë 26 raste
Durrës 5 raste (njëri prej të cilëve ka ndërruar jetë)
Lushnje 2 rast
Elbasan 2 raste
Fier 5 raste
Rrogozhinë 2 raste
Kosovë, shkon në 13 numri i të infektuarve
Është rritur numri të prekurve me virusin COVID-19 në 13 persona në Kosovë.
Ministri i Shëndetësisë, Arben Vitia, bëri të ditur se janë regjistruar edhe katër raste të reja, që janë nga fshati Stubëll i Vitisë, familjarë të ngushtë të pacientit të diagnostikuar pozitiv të premten.
“Mbrëmë vonë, bazuar në rezultatet e testimeve u konfirmuan edhe katër raste të reja pozitive me COVID-19. Të katër rastet janë nga fshati Stubëll e Vitisë, familjarë të ngushtë të pacientit të diagnostikuar pozitiv me COVID-19, me datë 13.03.2020. E gjithë familja kanë qenë në vetizolim dhe Instituti Kombëtar i Shëndetit Publik ka bërë testimin edhe të familjarëve të tjerë. Në këtë situatë vetëdija dhe ndihma e juaj është e domosdoshme. Mbani distancë nga tjetri. Reduktoni daljet veç në raste emergjente. Ndiqni rekomandimet nga Ministria e Shëndetësisë dhe Instituti Kombëtar i Shëndetit Publik”, shkruan ministri Vitia.
Qeveria e Kosovës ka shpallur gjendjen emergjente të shëndetit publik, pas kërkesës së ministrit të Shëndetësisë, Arben Vitia.
Ditë e kobshme në Itali, 368 viktima brenda 24 orëve
Brenda 24 orëve Italia ka shënuar 368 viktima dhe numri i të infektuarve nga pandemia ka shkuar në mbi 24 mijë.
Të dhënat zyrtare nga Zyra e Mbrojtjes Civile tregojnë se në total nga COVID-19 kanë ndërruar jetë 1809 persona.
Numri i personave të shëruar është 2335, ndërsa nga personat e prekur mbi 1000 janë në terapi intensive.
Dita e djeshme u shënuan viktimat e para dhe në dy rajonet jugore italiane; 2 viktima në Sardenjë e viktima e parë në Calabria.
Turqia raporton 12 raste të reja me Koronavirus
Turqia ka identifikuar 12 raste të reja me Koronavirus, duke e çuar numrin e të infektuarve gjithsej në 18, tha Ministri i Shëndetësisë Fahrettin Koca, duke shënuar rritjen më të lartë ditore që kur vendi njoftoi rastin e parë javën e kaluar.
Koca tha se dy nga rastet e reja kishin të bënin me rastin e parë të raportuar në vend, shtatë kishin udhëtuar nga Evropa dhe tre nga Shtetet e Bashkuara.
Qeveria turke ka rritur masat për të ndaluar përhapjen e virusit, duke urdhëruar mbylljen e shkollave dhe universiteteve, organizimin e ngjarjeve sportive pa spektatorë dhe ndalimin e fluturimeve në shumë vende.
Mijëra myslimanë që ktheheshin në Turqi nga një udhëtim në Arabinë Saudite u futën në karantinë të dielën dhe Ministria e Brendshme tha që lokalet dhe klubet e natës do të mbyllen nga e hëna.
Radhë të gjata në kafenetë e Amsterdamit para mbylljes
Radhë të gjata u formuan jashtë kafeneve të Amsterdamit para se të mbyllen deri më 6 prill. Fotot kanë qarkulluar online dhe shihet numri i madh i njerëzve që mbajnë radhë për t’u furnizuar me marijuanë, shitja e së cilës është e ligjshme.
Wow, everywhere in The Netherlands are big lines at the #coffeeshop to get the latest marijuana. Due to the lockdown all coffeeshops need to close in a few minutes. #COVID19NL #Coronavirusnl pic.twitter.com/u60P0k9l06
— Jaap Visser (@ESLJaap) March 15, 2020
Kina po përballet me raste të importuara
Rastet e përgjithshme të Koronavirusit në territorin e Kinës vazhdojnë të bien, por qytetet e mëdha duke përfshirë Pekinin dhe Shanghain tani po përballen me raste që përfshijnë udhëtarët e infektuar që vijnë nga jashtë.
Kina kontinentale kishte 16 raste të reja të konfirmuara të dielën, tha të hënën Komisioni Kombëtar i Shëndetësisë, duke sjellë numrin e përgjithshëm të rasteve të konfirmuara në Kinë deri tani në 80.860. 20 infeksione të reja u shënuan një ditë më parë, nga të cilat 12 ishin infeksione të importuara.
Në Pekin llogariten katër raste, në provincën Guangdong katër, Shanghai dy, provinca Yunnan një dhe provinca Gansu një. Deri tani Kina ka 123 raste të importuara.
74 raste të reja në Korenë e Jugut
Në Korenë e Jugut janë rregjistruar 74 raste, numri më i ulët i rasteve të reja të rregjistruar në këtë vend. Në Korenë e Jugut janë në total 8236 persona të infektuar, ndërsa 75 kanë humbur jetën.
Australi, 300 të infektuar
Në Australi ka rreth 300 të infektuar ku 14 raste të reja u rregjistruan në Viktoria. Viktoria, Australia perëndimore, Queensland dhe Australia Jugore kanë shpallur gjendjen e emergjencës.
Iran, 100 të vdekur në 24 orë
Irani njoftoi se më shumë se 100 njerëz kishin vdekur në 24 orët e kaluara, me rastet e konfirmuara afro 14,000. Teherani tha që lufta kundër shpërthimit të epidemisë po pengohej ashpër nga sanksionet e SHBA.
OBSH: 5800 të vdekur në mbarë botën
Qeveritë në mbarë botën rritën kufizimet në jetën e përditshme dhe lëvizjen e njerëzve në përpjekje për të frenuar përhapjen e COVID-19. Më shumë se 153,000 njerëz janë konfirmuar se kanë virusin globalisht, sipas Organizatës Botërore të Shëndetit (OBSH). Numri i të vdekurve është rritur në afro 5,800 njerëz.
/Iconstyle.al
