Fondacioni Nobel, i cili administron Çmimet prestigjioze Nobel, ka bërë me dije se ka anuluar banketin tradicional të Dhjetorit në Stokholm për shkak të pandemisë së koronavirusit.
Lars Heikensten, Drejtori i Përgjithshëm i Fondacionit Nobel, tha se nuk është e mundur të mblidhen deri në 1.300 të ftuar në banket dhe të ulen pranë njëri-tjetrit mes masave kufizuese të COVID-19. Ai u shpreh se për shkak të pandemisë është e pasigurt nëse fituesit e çmimeve mund të udhëtojnë në Suedi.
Çmimet Nobel shpallen në tetor por festimet në dhjetor do të jenë të kufizuara për shkak të pandemisë. Fondacioni tha se nuk ishte plotësisht e qartë ende sesi dhe në çfarë forme do të zhvillohen ceremonitë e ndarjes së çmimeve.
Çmimi Nobel për Paqen shpallet në Oslo, Norvegji, ndërsa të tjerat jepen në Stokholm.
Heikensten tha në një deklaratë: “Java e Nobelit nuk do të zhvillohet si zakonisht për shkak të pandemisë aktuale.Ky është një vit shumë i veçantë kur të gjithë duhet të bëjnë sakrifica dhe t’u përshtaten rrethanave plotësisht të reja, por ne do t’u kushtojmë vëmendje të ndryshme fituesve të çmimeve, zbulimeve dhe veprave të tyre”.
/TIME
