Në vendin tonë numri i të infektuarve nga Koronavirusi ka shkuar në 51 dhe 20 prej tyre janë të shtruar tek Spitali Infektiv ku po marrin një shërbim më të specializuar.
Lidhur me mjekimin që marrin pacientët, mjeku Tritan Kalo thotë se ata po marrin një kurë me tre ilaçe, Actemra, Tamiflu dhe Aluvia.
Kalo ka publikuar në rrjetet sociale disa foto të mjekëve të Infektivit, bashkangjitur së cilës ka publikuar edhe ilaçet që po përdorin në këtë betejë.
Ai thotë se nuk mungon asnjë nga mjetet e domosdoshme në spital, që nga veshjet deri tek ilaçet.
“MBRËMJE në Shërbimin e Sëmundjeve Infektive…..Jemi këtu në krye të detyrës së bashku me Prof. N. Çomon, Dr. N. Kryemadhin, Dr. M. Qaton, Dr. Dr. A. Domin, Dr. A. Hoxhën si dhe një grup dijeplotë e vullnetplotë Infermjeresh, të mbështetur nga Sanitaret, Koordinatoret, etj….Bashkëqytetarë, ju DUHET të BINDENI se ato çka lexoni në shtypin botëror në lidhje me MUNDËSITË më të fundmit terapeutike të mjekimit, të të gjitha formave klinike të Covid-19 edhe ne po ua ofrojmë të sëmurëve tanë, për të bërë të mundur shpëtimin e jetëve të tyre….NUKU na mungojnë mjetet për t’u shërbyer, POR mbi të gjitha ju sigurojmë se NUKU na mungon humanizmi, dija e vullneti ynë për të bërë gjithshka të mundëshme në luftën për jetën e të sëmurëve tanë….Ju duam shumë, na mirëkuptoni dhe na mirëbesoni…Njëkohësisht ajo çka na frymëson është edhe fakti se, SOLIDARITETI dhe MBËSHTETJA e kolegëve mjekë e infermjerë NUKU na mungon….BASHKËRISHT ne do t’ia dalim mbanë”, shkruan Kalo.
Nga 51 raste të infektuar, në vendin tonë 8 prej tyre janë mjekë.
