Koronavirusi ka mbërritur përtej Adriatikut!
Kryeministri i Kroacisë, Andrej Plenkovic, ka konfirmuar rastin e parë të një personi të infektuar me Koronavirus, i cili ndodhet i shtruar në spital në kryeqytet.
“Pacienti është në klinikën e Zagrebit për sëmundje infektive. Është një person më i ri dhe ka simptoma më të buta. Ai është në izolim dhe gjendja e tij është e mirë për momentin”, tha Plenkovic në një konferencë për shtyp.
Ministri i shëndetësisë, Vili Beroš, theksoi që pacienti kishte qëndruar në Milano nga 19 deri më 21 shkurt.
Ndërkohë, Austria ka raportuar dy rastet e para të Koronavirusit, në provincën Tyrol.
Ende nuk ka asnjë indikacion mbi burimin e shpërthimit, por Tyrol kufizohet me veriun e Italisë, ku zyrtarët po përpiqen të kufizojnë përhapjen e Koronavirusit.
Deri më tani janë 80 mijë persona të prekur nga Koronavirusi në mbarë botën.
Shpërthimi më i madh në Evropë ka goditur Italinë, me më shumë se 260 raste të infektuarish dhe shtatë vdekje të raportuara, shumica në veri të vendit.
Shumë farmaci kanë mungesa të maskave higjienike dhe dezinfektuesve, dhe njerëzit i janë drejtuar internetit për t’i blerë ato. Çmimi i maskave në internet është rritur nga një cent në 10 € secila dhe një shishe me një litër dezinfektues që javën e kaluar ishte në shitje për 7 €, tani ka shkuar në 39 €, të paktën deri dje.
