Është rritur në 10 numri i të prekurve me Koronavirus në vendin tonë.
Dje qeveria vendosi mbylljen e pub-eve, diskoketave, palestrave, ambienteve për argëtimin e fëmijëve, qendrave sportive, pishinave, qendrave kulturore sociale apo qendrave të argëtimit në kuadër të masave të rrepta për të ndaluar përhapjen e Koronavirusit.
Hapur do të qëndrojnë restorantet po me kushtin që tavolinat në to të jenë 2 metra larg njëra-tjetrës.
Qeveria i ka dhënë të drejtën e pushimit nga data 10 deri në 23 mars njërit prej prindërve që kanë fëmijët në çerdhe, kopsht apo në shkollë. Një thirrje i është bërë edhe sektorit privat, që të lejojë pushim njërin nga prindërit nisur nga situata.
Vendimi vjen pas identifikimit të 10 rasteve me Koronavirus në vendin tonë, tre prej të cilëve ndodhen të shtruar te Infektivi, një në spitalin e Durrësit dhe të tjerët të izoluar në shtëpi pa simptoma.
Itali/ Koronavirusi vret 168 persona në ditë
Koronavirusi ka vrarë 168 më shumë njerëz në Itali në 24 orët e fundit, numri më i lartë në një ditë të vetme që nga fillimi i epidemisë në vend.
E gjithë Italia – një vend me rreth 60 milionë njerëz – u vendos në karantinë ndërsa qeveria rriti përpjekjet për të trajtuar shpërthimin e Koronavirusit që ka vrarë 631 njerëz dhe ka prekur më shumë se 10,000.
Greqia mbyll shkollat
Ministri i Shëndetësisë Vassilis Kikilias njoftoi të martën se Greqia do të mbyllë të gjitha shkollat për 14 ditët e ardhshme për të parandaluar përhapjen e Koronavirusit të ri të njohur si COVID-19.
Kikilias tha se kjo do të vlejë për të gjitha nivelet, nga institucionet e kujdesit ditor, deri tek institucionet e nivelit universitar, publike dhe private.
Sipas shifrave zyrtare që nga e marta, ka pasur pesë raste të reja, duke e rritur numrin e përgjithshëm të të infektuarve në 89.
Numri global i vdekjeve nga koronavirus tani është mbi 4,000, me afro 114,000 raste të konfirmuara, sipas Organizatës Botërore të Shëndetit (WHO).
COVID-19 e ka origjinën në Kinë por ka arritur në mbi 100 vende.
Turqia konfirmon rastin e parë me Koronavirus
Ministri turk i Shëndetësisë Fahrettin Koca tha se një pacient mashkull u diagnostikua me Koronavirusin e ri pasi u testua pozitivisht, raportoi agjensia e lajmeve Reuters.
Ky është rasti i parë i konfirmuar në vend me Koronavirus. Personi është në izolim dhe familjarët e pacientit janë nën vëzhgim.
BE premton 28 miliardë dollarë për të trajtuar krizën e Koronavirusit
Komisioni Evropian do të krijojë një fond me vlerë 25 miliardë euro (28 mld $) për të trajtuar krizën ekonomike të shkaktuar nga shpërthimi i Koronavirusit, tha kryetarja e degës ekzekutive të BE.
Duke folur pas një konference të liderëve të BE, Ursula von der Leyen tha se fondi i investimeve duhet të financohet me 7.5 miliardë euro para të BE-së dhe të ndihmojë sektorët e cenueshëm të ekonomisë.
“Ky instrument do të arrijë shpejt 25 miliardë euro. Për ta realizuar këtë do t’i propozoja Këshillit dhe Parlamentit këtë javë të lirojnë 7.5 miliardë euro likuiditet investimesh”, tha ajo një konferencë shtypi në Bruksel.
Kanadaja ndalon fluturimet me Italinë
Air Canada, linja ajrore më e madhe e vendit, ka ndaluar të gjitha fluturimet drejt dhe nga Italia për shkak të shpërthimit të Koronavirusit, deri në të paktën 1 maj.
Fluturimi i fundit i linjës ajrore për në Romë ishte planifikuar të nisej nga Toronto të martën, me fluturimin e fundit të kthimit që niset nga Roma për në Montreal të mërkurën.
Personi i gjashtë vdes në Mbretërinë e Bashkuar, rastet rriten në 373
Ka shkuar në gjashtë numri i të vdekurve nga Koronavirusi në Mbretërinë e Bashkuar, tha Ministria e Shëndetësisë, pasi numri i rasteve të konfirmuara u rrit në 373, nga 319 që ishte një ditë më parë.
Pacienti i cili po mjekohej nga Spitalet NHS Trust të West Hertfordshire, kishte kushte themelore shëndetësore, tha në një deklaratë Chris Whitty, shefi kryesor mjekësor i Anglisë.
Koronavirusi në Suedi, një rrezik shumë i lartë
Agjensia e Shëndetit Publik Suedez ngriti nivelin e rrezikut për ngjitjen lokale të Koronavirusit të ri në “shumë të lartë” nga “mesatar” dhe tha që po shihte shenja të përhapjes në komunitet në vendin Nordik.
Agjensia tha në një deklaratë se po shihte shenja të përhapjes së virusit në komunitet në rajonet që përqendrohen rreth dy qyteteve më të mëdha, Stokholmi dhe Gothenberg.
Njoftimi erdhi disa minuta pasi rajoni i Stokholmit raportoi një rritje në rastet e konfirmuara të Koronavirusit në 207.
Vatikani mbyll sheshin e Shën Pjetrit, Bazilikën për turistët
Sheshi i Shën Pjetrit dhe bazilika kryesore e tij janë mbyllur për turistët dhe grupet e udhëhequra për shkak të Koronavirusit, por anëtarët individualë të besimtarëve mund të hyjnë në bazilikë për t’u lutur, tha Vatikani.
Numri i të vdekurve në Francë rritet në 30
Numri i vdekjeve në Francë nga shpërthimi i Koronavirusit është rritur në 30 nga 25 një ditë më parë, tha autoriteti francez i shëndetit publik.
Koronavirusi vret 54 njerëz të tjerë në Iran
Koronavirusi ka vrarë 54 njerëz të tjerë në Iran në 24 orët e fundit, numri më i lartë në një ditë të vetme që nga fillimi i epidemisë në vend.
Kjo ngriti numrin e vdekjeve në 291 mes 8.042 rasteve, tha zëdhënësi i Ministrisë së Shëndetësisë Kianoush Jahanpour në një konferencë televizive.
881 raste të reja janë konfirmuar, duke e çuar numrin total në 8,042.
