Banka e Shqipërisë ka vendosur të “ngrijë” pagesat e kredive për tre muaj.
Ky vendim mësohet se do të jetë i vlefshëm për individët dhe për subjektet.
Banka e Shqipërisë thekson se këstet do të shtyhen dhe kjo nuk do të thotë aë ata janë falur.
Vendimi është marrë në përshtatje me masat e marra për parandalimin e përhapjes së Koronavirusit me qëllim shmangien e radhëve në banka dhe për të eliminuar sa më shumë të jetë e mundur daljen e individëve nga banesat apo dhe shmangien e kontakteve të mundshme.
Gjatë periudhës së “ngrirjes” së pagesës së kredive nuk do të aplikohen gjobat mbi mospagesën.
“Njoftim për anulimin e disa aktiviteteve të Bankës së Shqipërisë Në kushtet e situatës së krijuar dhe masave të ndërmarra nga Qeveria Shqiptare me qëllim frenimin e përhapjes së virusit COVID-19, të tilla si pezullimi i procesit mësimor deri në datën 23 mars dhe ndalimi i grumbullimeve apo organizimit të aktiviteteve publike dhe jopublike deri më 3 prill, jemi të detyruar t’i anulojmë aktivitetet edukative të Javës së Parasë 2020, të parashikuara të organizoheshin në datat 23-29 mars 2020.
Gjithashtu, ju informojmë se në këto kushte, Muzeu i Bankës së Shqipërisë dhe Dyqani Numizmatik do të qëndrojnë të mbyllur deri në një njoftim të dytë. Duke shpresuar në mirëkuptimin tuaj, urojmë në një zgjidhje sa më të shpejtë të situatës”, ka lajmëruar më herët BSH.
