Vogue Italia po reagon ndaj pandemisë së koronavirusit me një botim të veçantë, duke paraqitur, për herë të parë në historinë e revistës, një kopertinë krejtësisht të bardhë.
“E bardha është, para së gjithash, respekti. E bardha është rilindja, drita pas errësirës, bashkimi i të gjitha ngjyrave. E bardha është uniforma e atyre që kanë shpëtuar jetë ndërsa rrezikojnë vetë. Është koha dhe hapësira për të menduar, dhe për të heshtur gjithashtu. E bardha është për njerëzit që po e mbushin këtë kohë dhe hapësirë me ide, mendime, histori, vargje, muzikë dhe dashamirësi ndaj të tjerëve”, tha kryeredaktori i Vogue Italia Emanuele Farneti.
“Është një kujtesë që pas krizës në 1929, rrobat u kthyen të bardha, një ngjyrë e zgjedhur për të shprehur pastërti në të tashmen dhe shpresë për të ardhmen. Dhe mbi të gjitha, e bardha nuk dorëzohet; është një faqe e zbrazët për t’u mbushur, pjesa kryesore e një historie të re do të fillojë”.
Brenda botimit të muajit prill të revistës – e cila mund të shkarkohet falas në faqen e internetit -shfaqen krijime të realizuara brenda një jave nga 40 artistë që zakonisht bashkëpunojnë me revistën.
Revosta sjell idetë e personaliteteve të modës me profil të lartë si Steven Klein, David Sims, Mert Alas dhe Marcus Piggott, Joe McKenna, Bella dhe Gigi Hadid, Collier Schorr, Glen Luchford, Paolo Roversi , Petra Collins, Willy Vanderperre, Olivier Rizzo dhe Lindsey Wixson të cilët sjellin fotografi të vetes, familjeve dhe miqve të tyre.
/wwd.com/
