Policia ka nisur zbatimin e urdhërave të qeverisë, për parandalimin e përhapjes së koronavirusit.
Efektivët tashmë kanë të skanuar në tablet emrat e 120 mijë personave të ardhur nga Italia, të cilët do të mbahen nën mbikëyqrje.
Në rast se nuk janë të izoluar në shtëpi, ata do të gjobiten me 5 mijë euro, sipas urdhërit të kryeministrit Edi Rama.
Në filtër do të kalohen edhe kalimtarët, për rastet kur ka grumbullime mbi 2 persona.
Qeveria ka vendosur një sërë masash shtrënguese, për të parandaluar përhapjen e koronavirusit.
Një javë më parë u mbyllën shkollat, lokalet, si dhe u pezulluan të gjitha aktivitetet kulturore e sociale.
Kryeministri urdhëroi ndërprerjen e qarkullimit të makinave private, duke përjashtuar automjetet e shërbimeve të emergjencës, makinat shtetërore dhe ato me autorizime.
Prej ditësh në terren ushtria dhe policia kanë ngritur pika kontrolli për të mbikëqyrur urdhërat e kryeministrit.
Ky i fundit ndërkohë paralajmëroi pak ditë më parë se do të ndalojë lëvizjet edhe nëpër parqe, pasi tashmë nuk ka më kohë për paralajmërime.
Shqipëria numëron 51 raste me koronavirus dhe një viktimë.
Në mesin e të infektuarve janë edhe mjekë, të cilët janë infektuar nga pacientë që kanë fshehur udhëtimet në Itali.
Aktualisht 20 prej pacientëve ndodhen në godinën e Infektivit, ku 3 prej prej tyre i janë nënshtruar terapisë intensive./gazetareforma
