Kompania e shpërndarjes së ushqimit “Snapfood”, ka paditur këtë të martë, datë 11 gusht 2020, Autoritetin e Konkurrencës, pasi ky institucion, nuk po bën asgjë për të ndalur abuzimin në treg nga ana e kompanisë “Baboon”.
Kjo kompani, me ekskluzivitetin e kontratave të veta po cenon dhe dëmton restorantet apo bizneset familjare që nuk po e ngrejnë dot kokën pas krizës nga tërmeti dhe pandemia; si dhe operatorët e tjerë të tregut, që operojnë në fushën e shpërbimit të transportit/shpërndarjes dhe dorëzimit të ushqimeve të porositura.
“Snapfood” i është drejtuar Autoritetit të Konkurrencës prej korrikut të 2019-s
Gjithçka nisi në korrik të 2019-ës kur pas një kontrolli rutinë nga Autoriteti i Konkurrencës, “Snapfood.al” ka dërguar një ankesë në këtë institucion duke iu kërkuar të merren masa për kompaninë “Baboon”, që ushtron të njëjtin aktivitet, me arsyetimin se kjo e fundit u kërkon klientëve të saj të firmosin kontrata ekskluzive, duke penguar qartazi konkurrencën në treg.
Në një kohë që bizneset kanë shumë nevojë për përkrahje pas krizës ekonomike nga pandemia, “Baboon” ka krijuar një monopol në tregun e shërbimit të shpërndarjes së ushqimit dhe në kontratat e bashkëpunimit me bizneset partnere ka vendosur një klauzolë që specifikon se ato nuk mund të bashkëpunojnë me asnjë kompani të ngjashme sikurse është “Snapfood” për një periudhë minimalisht 2-vjeçare.
Ndonëse Autoriteti i Konkurrencës ka kërkuar dhe një takim me përfaqësuesit e “Snapfood” për të mësuar detaje të tjera të lidhura me çështjen në fjalë, nuk ka ndërmarrë në vijim asnjë lloj mase ndaj “Baboon” dhe madje as nuk i është përgjigjur palës që ka bërë ankesën, kompanisë “Snapfood”, sikurse e parashikon ligji për të drejtën e informimit.
Përgjigja e vetme e Autoritetit të Konkurrencës ka ardhur thuajse një vit më vonë, në maj të 2020-ës pas kontaktimit nga iconstyle.al dhe “Snapfood” në të njëjtën kohë.
Institucioni përgjegjës që supozohet të sigurojë respektimin konkurrencës së lirë në treg, shkruante se në kontrollet e ushtruara nuk janë konstatuar elementë të shkeljes së ligjit “Për mbrojtjen e konkurrencës” duke iu shmangur çështjes thelbësore për të cilën ishte bërë ankesa: kontratat ekskluzive!
Dhe nuk është hera e parë që Autoriteti i Konkurrencës nuk po reagon!
Nëse do t’i hetonte paraprakisht kontratat ekskluzive të “Baboon”, me siguri do të dilte në përfundimin se ky subjekt është duke penguar restorantet apo bizneset e tjera që kërkojnë të bashkëpunojnë edhe me subjekte të reja që ofrojnë të njëjtin shërbim të shpërndarjes së produkteve ushqimore.
Por kjo nuk është hera e parë që Autoriteti i Konkurrencës nuk po e kryen detyrën e vet, duke pasur parasysh shumë sektorë nga ai i telekomunikacioneve, te ato bankare, të karburanteve, si dhe së fundi ai i laboratoreve private mjekësore, që kanë krijuar një oligopol me çmimet e analizave serologjike, 4000 lekë të reja, me qëllim që të shmangin konkurrencën e lirë në treg (lexo këtu).
Kështu, në mënyrë të qartë duket se Autoriteti i Konkurrencës, që lidhet drejtpërdrejtë me çështjen, dhe që paguhet nga taksapaguesit shqiptarë për të mbrojtur interesat publike, me mosveprimet e tij, ka lejuar abuzime të tilla në shumë raste.
“Snapfood”, shembull në kohë pandemie, uli tarifat!
Në pikun e pandemisë, restorante e fast food-e nisën të largoheshin nga platforma “Baboon” për shkak se u ishte kërkuar të paguanin një tarifë prej 20 % + TVSH të vlerës së porosive të marra në aplikacion. Sikur të mos mjaftonte klauzola absurde e ekskluzivitetit që nuk i lejon subjektet të bëhen pjesë e platformave të tjera, kjo tarifë tejet e lartë rrezikoi t’i fundosë tërësisht ato (lexo këtu).
Në të njëjtën periudhë, për t’i lehtësuar sa më shumë barrën në kohë pandemie, kompania “Snapfood” uli në mënyrë drastike tarifat e shërbimit për të gjithë bizneset që ishin pjesë e aplikacionit, duke u mundësuar atyre frymëmarrje në këto momente kritike (lexo këtu). Ky hap domethënës i “Snapfood” erdhi pas gjestit prekës të stafit të kompanisë, që iu bashkua nismës së Bashkisë së Tiranës #adoptonjëgjysh, duke u ofruar falas pazarin disa të moshuarve në kryeqytet të cilët për shkak të izolimit, ishin në pamundësi.
Në padinë e depozituar në Gjykatën e Tiranës, thuhet:
“Autoriteti i Konkurrencës duhet të ndërhyjë kur mbi bazën e evidencave të forta dhe bindëse, sjellja e supozuar abuzuese është e pritshme të çojë në përjashtime antikonkurruese. Autoriteti ka neglizhuar në vlerësimin e situatës dhe të rrethanave të ushtrimit të aktivitetit nga Baboon.al pasi në rast se do t’i vlerësonte siç duhej duke kryer hetim paraprak me siguri do të konkludonte që ky subjekt është duke penguar konkurencën, duke penguar subjektet që kërkojnë të marrin shërbimin e tregtimit të produkteve ushqimore online që në të njëjtën periudhë kohore të kenë mundësi të bashkëpunojnë edhe me subjekte të tjera që ofrojnë të njëjtin shërbim. Autoriteti i Konkurrencës me heshtjen e tij ka miratuar veprimet abuzive të subjektit Baboon.al. Baboon.al është një subjekt tregtar që zotëron shumicën e tregut dhe vendosja e termave të ekskluzivitetit çon në përjashtime ankti-konkurruese”.
