Performanca e Ronelës në Eurovizion mesa duket nuk do harrohet lehtë pasi komentet në rrjetet sociale vazhdojnë të analizojnë çdo aspekt. Mes tyre ka qenë dhe kompozitorja Eriona Rushiti e cila nuk i ka kursyer aspak kritikat. Ajo ka theksuar se mos-kualifikimi i shqipërisë pritej sepse performanca e Ronelës nuk ishte më e mira.
“Sigurisht që mbrëmë jo të gjitha shtetet arritën të shkojnë në finale dhe nuk është fundi i botës. Me aq sa i kam ndjekur këngët e Eurovisionit këtë vit, si dhe perfomancat e natës së parë, mendoj që kualifikimet për në finale ishin të pritshme dhe të drejta. Këngë të stileve të ndryshme, por mbi të gjitha përfaqësime shtetesh me koncepte të qarta për atë që prezantonin. Dhe mbrëmë nuk vura re ndonjë ndasi politike, apo gjeopolitike. Sepse këngët që nuk kaluan ose ishin të vjetra në stil, ose nuk u kënduan mirë, sepse këngëtarët nuk e përballuan skenën siç duhej, ose si në rastin tonë ku të gjitha komponentët e një kënge çaluan. Të marrësh pjesë në një garë kënge, në rradhë të parë duhet të kesh këngën, pastaj interpretimin, e në fund performancën. Sikur njëra nga këto të mos jetë në vendin e duhur, ajo skenë e madhe të nxjerrë zbuluar dhe ne mbrëme nuk kishim asnjërën nga këto komponentë”- u shpreh ajo.
Më tej Eriona i ka drejtuar kritikat e saj direkt kundrejt Ronelës duke u shprehur se edhe pse ajo bëri më të mirën e mundshme, ka bërë aq sa mund të bëjë ajo për veten e saj, por jo për shtetin që përfaqëson.
“Jam e sigurtë që mbrëmë Shqipëria nuk ka marrë vlerësim të jurive profesionale, por mund të ketë patur vota publiku të cilat nuk mjaftojnë për ta kaluar këtë garë. Po kthehem edhe njëherë në fillim ku thashë nuk është fundi i botës dhe se Ronela do vazhdojë jetën e saj artistike për fansat që e ndjekin gjithmonë, por edhe për ata fansa të shtuar këto kohe që me natyrën e saj karizmatike i ka mbajtur gjallë që nga koha e shpalljes si fituese e festivalit. Por kur paraqitesh në Eurovizion, nuk është njësoj si të besh një klip e të marrësh ca klikime, nuk është e njejta gjë me të kënduarit në një shesh të mbushur me të rinj. Jo më kot u censuruan disa foto të Ronelës në proven e saj të parë. Organizatorët e Eurovizionit i kujtuan edhe njëherë ekipit shqiptar faktin qe ky është një eveniment familjar. Pra kemi të bëjmë me një show ndërkombëtar dhe jo individual. Me këtë nuk dua të them se jam kundra ekstravagancës, apo thyerjes së disa tabuve shqiptare, por të gjitha këto duhen bërë me art, duan eksperience skenike, duan krijimtari e mbi të gjitha duan dinjitet artistik e jo banalitet”- ka përfunduar ajo.
Mesa duket Eriona po e adreson direkt “dështimin” për kualifikim kundrejt Ronelës duke harruar shumë komponentë tjerë të rëndësishëm.
