Ruajtja e pronësisë intelektuale sa vjen e bëhet më e vështirë, për shkak të zhvillimit të teknologjisë. Në konferencën e organizuar me rastin e “Ditës Kombëtare të Pronësisë Intelektuale”, ministrja e Inovacionit Milena Harito, u shpreh se për ruajtjen e kësaj të drejte duhet të plotësohet ligji për të drejtën e autorit.
Kompozitori Aleksandër Lalo i ftuar në këtë aktivitet në shenjë proteste, pas fjalimit të tij u largua nga salla duke thënë: “Po iki të bëj drekën”.
“Kjo na intereson, nuk na interesojnë imazhe. Ne flasim në të shkuarën, krahasimet i bëjmë gjithmonë, fusim dhe pak politikë brenda. Nuk na duhet e shkuara se çfarë është bërë, na duhet se çfarë bëhet sot. Kaq ishte fjalimi i im, se do të shkoj të bëj drekën”, ka thënë Lalo dhe është larguar nga skena.
Ministrja Kumbaro e pyet nëse e do përgjigjen për ato që tha, por Lalo i vendosur për t’u larguar shtoi: “Nuk e dua, jepua këtyre, unë nuk fola për vete”.
