Televizioni më i ri A2 nisi dje për herë të parë transmetimin në ekranin shqiptar. Prej muajsh është shkruar për figurat e njohura të gazetarisë shqiptare që i janë bashkuar kanalit informativ, i hapur në partneritet ekskluziv me CNN.
Një ndër personazhet e njohur që u shfaq ishte edhe gazetarja Juli Krisafi, e cila braktisi “Top Channel” për televizionin më të ri.
Ajo do të moderojë emisionin e titulluar “Debati në A2CNN” dhe nëse ju duket si emër i dëgjuar më parë, atëherë keni të drejtë.
Një komentues vuri në dukje ngjashmërinë e habitshme mes emisionit të Juli Kristafit dhe atij të gazetarit Roland Qafoku, i cili drejton emisionin “Debati në Channel One”.
Në postimin e bërë në profilin zyrtar në Facebook të televizionit A2, ish-regjisori i emisionit të Qafokut komenton duke vënë në dukje ngjashmërinë.
“Mund të ndërroni emrin se ka vite që bëhet emision me këtë emërtim”, shkruan Ermir Doda, ndërsa poston edhe foton e Qafokut.
Moderatorët e profilit të Facebook-ut nuk kanë dashur të përgjigjen për këtë, por vendosën që të fshinin komentin.
